5 պարզ միջոց ծերացման գործընթացը դանդաղեցնելու համար

Օրգանիզմի ծերացումը բնական գործընթաց է, որից որևէ մեկը չի խուսափում, սակայն հետազոտությունները ցույց են տվել, որ կան միջոցներ, որոնք օգնում են հնարավորինս դանդաղեցնել այդ գործընթացն ու պահպանել երիտասարդությունը: Ձեր ուշադրությանն ենք ներկայացնում դրանցից մի քանիսը:

Ֆիզիկական ակտիվություն

Հետազոտությունները ցույց են տվել, որ ֆիզիկապես ակտիվ տարեցների մոտ մկանային համակարգն ավելի լավ է զարգացած, խոլեստերինի մակարդակն ավելի ցածր է, իսկ իմունային համակարգն ավելի լավ է գործում: Ընդ որում, հատկապես առողջարար են համարվում աերոբային վարժությունները, որոնց շնորհիվ ամրապնդվում է սրտամկանն, իսկ օրգանիզմն ավելի լավ է վերահսկում արյան մեջ շաքարի մակարդակը: Բացի այդ, ֆիզիկական վարժությունները բարելավում են կոգնիտիվ կարողությունները, իսկ դա ծերացման դեմ պայքարի ամենաարդյունավետ միջոցներից մեկն է:

Օգտագործել մանրաթելեր

Գիտնականների խոսքով՝ երիտասարդության պահպանման համար «կախարդական» մթերք են համարվում մրգերը, բանջարեղենն ու ամբողջական հացահատիկները: Դրանք հարուստ են մանրաթելերով, որոնք շատ կարևոր են անոթների առողջացման ու գլխուղեղի ակտիվության պահպանման համար:

Օգտագործել սպիտակուցներ

40 տարեկանից հետո մարդու օրգանիզմն սկսում է կորցնել մկանային զանգվածը, իսկ այս գործընթացը ծերացման մասին վկայող երկրորդ մարկերն է կոգնիտիվ գործառույթների թուլացումից հետո: Մասնագետների խոսքով՝ նման խնդիրներից խուսափելու համար հարկավոր է ամեն անգամ սնվելիս 25-30 գրամ ապիտակուց օգտագործել: Սպիտակուցների հարուստ աղբյուր են ընկույզները, կաթն ու կաթնամթերքը, անյուղ միսն ու լոբազգիները:

Պահպանել աղիների առողջ միկրոֆլորան

Աղիներում է գտնվում իմունային համակարգի աշխատանքի համար շատ կարևոր բջիջների ավելի քան 70 տոկոսը, ուստի աղիների առողջությունից ու դրա միկրոֆլորայի վիճակից է կախված տարբեր հիվանդությունների, այդ թվում նաև նեյրոդեգեներատիվ խանգարումների զարգացման նկատմամբ հակվածությունը: Աղիների միկրոֆլորայի վիճակի կարգավորման համար հարկավոր է հրաժարվել ծխախոտից ու ալկոհոլից, ինչպես նաև վերահսկողության տակ պահել սննդակարգը՝ սահմանափակելով վերամշակում անցած մթերքի գործածությունն ու օգտագործելով ավելի շատ թարմ ու պրոբիոտիկներով և պրեբիոտիկներով հարուստ մթերք:

Զբոսնել բնության գրկում

Մաքուր օդին զբոսնելիս մարդը վիտամին D է ստանում, որը պաշտպանում է տարիքային հիվանդություններից, ինչպիսին են քաղցկեղն ու սրտանոթային հիվանդությունները: Բացի այդ, հոտազոտությունները ցույց են տվել, որ վիտամին D-ի բարձր մակարդակը կանխում է քրոմոսոմների թելոմերների երկարության նվազումը, ինչը կապված է ծերացման գործընթացի արագության հետ: Բավարար քանակությամբ վիտամին D ստանալու համար բավական է օրական արևի տակ զբոսնել 15-30 րոպե: