Հայաստանում սեփականության վերաբաշխում չկա․ ստիպված ենք լինելու անցումային արդարադատություն կիրառել․ Փաշինյան

Վարչապետ Փաշինյանն այսօրվա ասուլիսի ժամանակ մի քանի օրինակ ներկայացրեց, երբ նախկին պաշտոնյաները կասկածելի գործարքներով սեփականաշնորհել են համայնքային հողեր կամ այլ սեփականություն, ու ասաց, որ դա խնդիր է ստեղծում ներդրողների համար։

«Երբ ես օգոստոսին խոսում էի անցումային արդարադատության մասին, դա էլի շա՜տ մեծ աղմուկ էր բարձրացնում, որ հաա՜, Հայաստանում սեփականության վերաբաշխման գործընթաց է։ Հույս ունեմ՝ բոլորդ տեսնում եք, որ ոչ մի սեփականության վերաբաշխման գործընթաց Հայաստանում չկա։ Բայց նաև մենք անհրաժեշտություն ենք ունենալու անցումային արդարադատության գործիքներ կիրառել»,- ասաց Փաշինյանը։

Վարչապետն ասաց, որ խոսքը բացառապես պաշտոնյաների, նախկին պաշտոնյաների մասին է, որովհետև կարևոր է ներբիզնեսային հարաբերությունների մեջ չընկնելը։ Անցումային արդարադատության գործիքներից մեկը, ըստ Փաշինյանի, այն է, որ նախկին բարձրաստիճան պաշտոնյաներին խորհուրդ են տալիս ներկայանալ իրավապահ մարմիններին ու տալ խոստովանական ցուցմունքներ, այդ ամենը վերադարձնել Հայաստանին։