Ֆաստ ֆուդն ինչպե՞ս է ազդում մեր օրգանիզմի վրա

Ֆաստ ֆուդի օգտագործումը մեր անոթների վրա ազդում է բջջային մակարդակում՝ դրանք պակաս առաձգական դարձնելով, պնդում են Իլինոյսի համալսարանից մասնագետները:

Գիտնականները երկու հետազոտություն են անցկացրել, եւ երկուսն էլ նշել են փոքր խտության լիպոպրոտեինների (ՓԽԼՊ) եւ դրանց պակաս հայտնի օքսիդացված տարբերակի միանշանակ վնասի մասին: Առաջին հետազոտության ժամանակ լաբորատոր մկներին (երկու խմբի էին բաժանված) կերակրել են հաշվեկշռված սնունդով կամ այսպես կոչված՝ Արեւմտյան սննդակարգով (շատ ճարպեր, ածխաջրեր, քիչ սպիտակուց եւ ֆաստ ֆուդ): Երկրորդ խմբի մկների անոթներն առաձգականությունն արագ կորցրել են:

Իսկ մարդու էնդոթելային բջիջներով (կազմում է անոթների ծածկույթը) հետազոտությունը ցույց է տվել, որ ՓԽԼՊ-ն եւ դրա օքսիդացված տարբերակը բջջային թաղանթներին ստիպել է ավելի կարծր եւ հաստ դառնալ, իսկ արդյունքում բացասական էֆեկտը մեծացել է:

Հետաքրքիր է, որ բացասական էֆեկտի համար բավական էր շատ քիչ քանակությամբ օքսիդացված ՓԽԼՊ, որպեսզի բջջային թաղանթը վատթար ուղղությամբ փոխվեր: Հայտնի է, որ օքսիդացված ՓԽԼՊ-ները նպաստում են նստվածքների առաջացմանը եւ անոթների խցանմանը, ինչը մեծացնում է գլխուղեղի ու սրտի կաթվածների եւ շատ այլ խնդիրների առաջացման հավանականությունը: