Բրիտանացի հրշեջ-փրկարարները 1988թ.-ի Սպիտակի երկրաշարժից 30 տարի անց կրկին այցելել են աղետի գոտի. BBC (տեսանյութ)

1988թ.-ի դեկտեմբերի 7-ին Հայաստանում գրանցված, ավելի քան 25 000 մարդու կյանք խլած ավերիչ երկրաշարժից 30 տարի անց Մեծ Բրիտանիայի Լանքաշիրի փրկարարական թիմից երկու հրշեջ-փրկարար, որոնք թիմի հետ մեկնել էին աղետի գոտի՝ փրկարարական աշխատանքներ իրականացնելու, կրկին այցելել են ողբերգության վայր:

BBC-ի հրապարակած տեսանյութում թոշակի անցած հրշեջներ 75-ամյա Փոլ Բըրնսը և 69-ամյա Ռեջի Բերին կիսվել են աղետի մասին իրենց մռայլ հիշողություններով: Նրանց թիմն աղետի գոտի է ժամանել երկրաշարժից 5 օր անց:

«Ողջ մնացածների համար շատ կարևոր էր հարազատների մարմինները գտնելը, որպեսզի կարողանային նրանց արժանավայել թաղել»,- պատմել է Բերին:

Տեսանյութում անդրադարձ է կատարվում նաև Համլետ Դիլբարյանին, որը միայնակ է ապրում վագոն-տնակում: Նրա ընտանիքի բոլոր անդամներն ավերիչ երկրաշարժի զոհ են դարձել:

Տեսանյութում ցուցադրվում են երկրաշարժի ավերածություններից կադրեր, ամբողջությամբ ավերված նախկին դպրոցի փլատակները, երկրաշարժի զոհերի գերեզմանոցը, ինչպես նաև Սպիտակ քաղաքի ներկա տեսքը: