Մեծ Բրիտանիայում առաջարկում են ստուգել օդաչուների քնկոտությունը թռիչքից առաջ

Ավիաընկերությունների օդաչուների բրիտանական ասոցիացիան (BALPA) զգուշացրել է, որ ինքնաթիռների ուղևորների անվտանգության համար ամենամեծ սպառնալիքն օդաչուների քնկոտությունն է, ասոցիացիան փորձել է խնդրի վրա սևեռել հատկապես քաղաքական գործիչների ուշադրությունը, գրում է The Telegraph-ը:

Ավելի քան 10 000 օդաչուի ներկայացնող արհմիությունից հայտնել են, որ ցանկանում են, որ ավիաընկերությունները կիրառեն համակարգչային հատուկ ծրագրեր, որոնք թույլ կտան գնահատել օդաչուների հոգնածության աստիճանը թռիչքից առաջ:

Ավիացիոն չափանիշների եվրոպական գործակալության սահմանած կանոնների համաձայն՝ չափից շատ հոգնած լինելու մասին հայտնած օդաչուները չպետք է մասնակցեն թռիչքին: Չնայած դրան՝ բազմաթիվ օդաչուներ ստիպված են լինում օդ բարձրանալ, քանի որ զգուշանում են տուգանքներից կամ աշխատանքից զրկվելուց:

Միևնույն ժամանակ British Airways, easyJet և Virgin Atlantic ավիաընկերությունները հայտնել են, որ իրենց պայմաններն ու գործելաոճը լիովին համապատասխանում են պահանջվող անվտանգության նորմերին: