Ավտոմեքենան՝ թակարդ
Նորվեգիայում ավտոմեքենաների 17-ամյա գողը արգելափակվել է մեքենայում, որը փորձել է գողանալ, եւ ստիպված է եղել ոստիկանություն կանչել։
Ինչպես տեղեկացնում է FoxNews-ը, յուրօրինակ դեպք է տեղի ունեցել Նորվեգիայի մեծությամբ երրորդ քաղաք Տրոնհեյմում։ Դեռահասը զանգել է ոստիկանություն եւ հայտնել, որ իրեն օգնություն է հարկավոր, քանի որ արգելափակվել է մեքենայի մեջ։
Ոստիկանության ներկայացուցիչը տեղացի լրագրողներին ասել է, որ երիտասարդը, հավանաբար «գերագնահատել է իր ուժերը»։ «Նա որոշել է, որ ոստիկանությունը ամենահարմարն է օգնության համար այդ իրավիճակում, եւ մենք պետք է շնորհակալություն հայտնենք նրան»,- հավելել է նա՝ գրում է Adresseavisen թերթը։
Կասկածյալը ոստիկանությանը հայտնի է մանր հանցագործություններով։