Թաիլանդում թագավորի աղջկա «կարած» զգեստը քննադատած բլոգերին ազատազրկում է սպառնում

Թաիլանդցի բլոգեր Վանչալեոմ Ջեմնենֆոլը քննադատել է թաիլանդական գեղեցկության թագուհու զգեստը: Պարզվել է, որ դրա դիզայները թագավորի աղջիկն է, և բլոգերը ստիպված է եղել ներողություն խնդրել, գրում է Daily Mail-ը:

Բլոգերը սոցկայքերում առավել հայտնի է Mixy Bigmouth կեղծանվամբ: Նրա յութուբյան ալիքն ավելի քան կես միլիոն հետևորդ ունի:

Վերջերս աղջիկն անզգուշաբար իր կարծիքն էր հայտնել «Միսս Տիեզերք 2018» մրցույթում Թաիլանդի ներկայացուցչուհու՝ Սոֆիդա Կանչանարինի կրած երկնագույն զգեստի վերաբերյալ՝ այն անվանելով տգեղ:

Շուտով ոստիկանությունը հետաքրքրվել է աղջկանով: Բանն այն է, որ զգեստի դիզայները Թաիլանդի արքայադուստրն է՝ Սիրիվաննավարի Նարիրատանան: Երկրի օրենքների համաձայն՝ թագավորական ընտանիքի անդամին վիրավորելն արգելված է, դրա համար մինչև 15 տարվա ազատազրկում է նախատեսվում:

Դեպքը լուրջ ընթացք է ստացել, և բլոգերը ստիպված է եղել ջնջել քննադատություն պարունակող հրապարակումը: Նա հայտարարել է, որ թագավորական ընտանիքին վնաս հասցնելու մտադրություն չի ունեցել: