Իրանի արտգործնախարարն ԱՄՆ-ի վարած քաղաքականությունը «սյուրռեալիզմ» է անվանել
Իրանի արտգործնախարար Մոհամադ Ջավադ Զարիֆը միջազգային հարաբերություններում ԱՄՆ-ի մոտեցումը սյուրռեալիզմ է անվանել, հայտնում է ՏԱՍՍ գործակալությունը:
«Քիչ է, որ Վաշինգտոնը խախտում է ՄԱԿ-ի Անվտանգության խորհրդի 2231 բանաձևը և անգամ սպառնում պատժել նրանց, ովքեր չեն ցանկանում հետևել ամերիկյան անօրինական պատժամիջոցներին, այժմ էլ ամերիկացիները մեղադրում են Իրանին այդ համաձայնագրի խախտման համար»,- ասել է Զարիֆը:
Շաբաթ ԱՄՆ պետքարտուղար Մայք Պոմպեոն հայտարարել է, որ Թեհրանը միջին հեռահարության բալիստիկ հրթիռի փորձարկում է իրականացրել՝ ի հեճուկս ՄԱԿ-ի ԱԽ-ի 2231 բանաձևի: Նա նշել է, որ խոսքը «միջին հեռահարության բալիստիկ հրթիռի մասին է, որն ունակ է մի քանի մարտագլխիկ կրել»:
2015 թվականի հուլիսի 20-ին ՄԱԿ-ի ԱԽ-ն ընդունել է 2231 բանաձևը, որը հավանության է արժանացնում իրանական միջուկային ծրագրի վերաբերյալ Գործողությունների համատեղ համապարփակ ծրագրի ընդունումը:
Հիշեցնենք, որ Իրանն ու միջազգային «միջնորդ վեցյակը» (ՌԴ, ԱՄՆ, Մեծ Բրիտանիա, Չինաստան, Ֆրանսիա և Գերմանիա) 2015-ին կնքել էին Իրանի միջուկային ծրագրի վերաբերյալ Գործողությունների համատեղ համապարփակ ծրագրի մասին համաձայնագիրը, որով չեղարկվում էին Իրանի դեմ սահմանված տնտեսական պատժամիջոցները, իսկ Իրանն էլ սահմանափակել է միջուկային փորձարկումները: