Բանկոմատը 10-ի փոխարեն 100 դոլարանոցներ է բաժանել. բանկոմատի մոտ հերթ է գոյացել (տեսանյութ)

ԱՄՆ Տեխաս նահանգում Bank of America-ի բանկոմատներից մեկի մոտ մարդկանց միջև ծեծկռտուք է տեղի ունեցել. պատճառը եղել է սխալը, որի արդյունքում բանկոմատը 10-ի փոխարեն 100 դոլարանոց թղթադրամներ է տրամադրել:

Ինչպես նշում է Daily Mail-ը, դրա հետևանքով բանկոմատի մոտ մեծ հերթ է գոյացել. մարդիկ որոշել են բաց չթողնել «հարստանալու» առիթը:

Պատմությունը սկսվել է մի հաճախորդից, որը բանկոմատից 10 դոլար է պահանջել, սակայն փոխարենը 100-ն է ստացել: Նա այս մասին գրել է սոցցանցերում, ինչից հետո մարդիկ շտապել են բանկոմատի մոտ: Գոյացած երկար հերթում, սակայն, մարդկանց միջև ծեծկռտուք է տեղի ունեցել:

Ի վերջո, միջամտել է ոստիկանությունը, որը շրջափակել է տարածքն ու փակել բանկոմատը:

Ավելի ուշ Bank of America-ից հայտնել են, որ սխալ է տեղի ունեցել. 10 դոլարանոցների տեղում 100 դոլարանոց թղթադրամներ են դրվել:

Հատկանշական է, որ բանկի ղեկավարությունը թույլ է տվել «հարստացածներին» չվերադարձնել 100 դոլարները: Սակայն բանկը հրաժարվել է հայտնել, թե բանկոմատը սխալմամբ քանի 100 դոլարանոց է տրամադրել: