Արցունքաբեր գազ և ռետինե փամփուշտներ. ինչպես են ամերիկացի սահմանապահները հետ մղել սահմանը հատել փորձող ներգաղթյալներին (լուսանկարներ, տեսանյութ)

Բրիտանական The Guardian և Daily Mail պարբերականներն ուշագրավ ֆոտոշարքերով ու տեսանյութերով անդրադարձել են ամերիկացի սահմանապահների ու Հարավային Ամերիկայից ժամանած ապօրինի ներգաղթյալների միջև նոյեմբերի 25-ին տեղի ունեցած թեժ բախումներին:

Հայտնի է, որ մոտ 500 ներգաղթյալ, այդ թվում՝ կանայք ու երեխաներ, փորձել են ապօրինաբար հատել ԱՄՆ սահմանը: Դրան ի պատասխան ամերիկյան կողմն արցունքաբեր գազ ու ռետինե փամփուշտներ է կիրառել:

Միջադեպը տեղի է ունեցել ԱՄՆ-ին սահմանակից մեքսիկական Տիխուանայում (Սան Յիսիդրո անցակետ), որի քաղաքապետն ավելի վաղ մարդասիրական ճգնաժամ էր հայտարարել՝ բողոքելով, որ իշխանությունները չեն կարողանում լուծել քաղաք ժամանած մոտ 5.000 ներգաղթյալներին ապաստան տրամադրելու հարցը:

Հայտնի է, որ ամերիկա-մեքսիկական սահմանին 7.415 ներգաղթյալ է կուտակվել, որոնց մեծ մասը եկել է Հոնդուրասից:

Միացյալ Նահանգների նախագահ Դոնալդ Թրամփը հայտարարել է, որ չի պատրաստվում ապաստան տրամադրել նմանատիպ «քարավանների» անդամներին՝ նշելով, որ նրանց մեջ շատ են հանցագործները, հանցախմբերի անդամներն ու ահաբեկիչները: 

Հոկտեմբերից սկսած Հարավային Ամերիկայի մի շարք պետություններից՝ Հոնդուրասից, Սալվադորից ու Գվատեմալայից, հազարավոր ներգաղթյալների «քարավաններ» սկսել են շարժվել դեպի Միացյալ Նահանգների սահման: Նրանց ճանապարհն անցնում է ԱՄՆ-ին սահմանակից Մեքսիկայով, որի իշխանություններն անտեսել են Թրամփի՝ ներգաղթյալների ընթացքը խոչընդոտելու պահանջը: