Ուկրաինայում նախագահական ընտրություններ տեղի կունենան 2019-ի մարտի 31-ին

Ուկրաինայում նախագահական ընտրություններ կանցկացվեն 2019 թվականի մարտի 31-ին, նման որոշում է ընդունել երկրի գերագույն ռադան նախօրեին՝ Ուկրաինայում ռազմական դրություն մտցնելու որոշման հաստատումից հետո, փոխանցում է ukranews.com-ը:

Նշվում է, որ նախագծին կողմ է քվեարկել 298 պատգամավոր: Նախագահական ընտրությունների հետաձգումն անմիջական կապ ունի երկրում ռազմական դրություն սահմանելու որոշման հետ. ընտրությունների՝ մարտի 31-ին նշանակումը ռազմական դրության ընդունման հարցով քվեարկությանը մասնակցած մի շարք խմբակցությունների պահանջն է:

Ինչպես գրում է ռուսական «Коммерсантъ»-ը, դեռևս հոկտեմբերին միջազգային BURI և ուկրաինական «Սոֆիա» հետազոտական կենտրոնների կատարած հարցումները ցույց են տվել, որ Ուկրաինայում նախագահի հնարավոր թեկնածուներից ամենաբարձր վարկանիշն ունի նախկին վարչապետ, «Բատկիվշչինա» կուսակցության առաջնորդ Յուլյա Տիմոշենկոն (15,9 տոկոս), երկրորդ տեղում է գործող նախագահ Պյոտր Պորոշենկոն (9,3 տոկոս), նրան հաջորդում է «Ընդդիմադիր դաշինք»-ի համանախագահ Յուրի Բոյկոն (8,8 տոկոս):

Նախօրեին Ուկրաինայի գերագույն ռադան հաստատել է երկրի ազգային անվտանգության ու պաշտպանության խորհրդի որոշումը, այն է՝ Ուկրաինայի տարածքում ռազմական դրություն սահմանել 30 օրով:

Հայտնի է, որ ռազմական դրություն կսահմանվի Ուկրաինայի բոլոր սահմանամերձ շրջաններում, ինչպես նաև Սև ու Ազովի ծովերի հատվածներում:

Հիշեցնենք, որ նոյեմբերի 25-ի առավոտյան ՌԴ Անվտանգության դաշնային ծառայությունը հայտնել է Ուկրաինայի ռազմածովային ուժերին պատկանող նավերի կողմից ռուսական ջրային սահմանի խախտման մասին:

Նշվում է, որ երեք ուկրաինական նավ ուղղություն է վերցրել դեպի Կերչի նեղուց՝ նախապես նավերի անցման համար համապատասխան դիմում չներկայացնելով: Արդյունքում ռուսական կողմը բեռնանավերով փակել է նեղուցը: Բացի այդ, ռուսական սահմանապահ նավը վնասել է ուկրաինական քարշակին, որը հետևում էր նավերի խմբին:

Այնուհետև Ռուսաստանն Ուկրաինայի ռազմածովային ուժերի գործողությունների պատճառով Սու-25 օդանավերը հերթապահության է ուղարկել Կերչի նեղուցի շրջանում:

Կիևը Մոսկվային մեղադրել է բացահայտ ագրեսիվ գործողություններ կատարելու համար: Կիևը նաև հայտնել է Ռուսաստանի կողմից իր նավերի ուղղությամբ կրակ բացելու ու նավերը գրավելու մասին: Ուկրաինայի ռազմածովային ուժերի փոխանցմամբ՝ ռուս սահմանապահները նավերը կանգնեցրել են զենքի կիրառմամբ: