Ավստրիայում հիջաբի արգելքը դպրոցներում կտարածեն նաեւ սիկխերի թյուրբանի վրա
Մանկապարտեզներում եւ ցածր դասարաններում աղջիկների հիջաբ հագնելու Ավստրիայի կառավարության արգելքը կարող է տարածվել նաեւ սիկխերի թյուրբանի վրա՝ տեղեկացնում է ORF-ն։
Ավստրիայի կառավարության կողմից կազմված նախագծի համաձայն՝ մանկապարտեզներում եւ դպրոցի ցածր դասարաններում կարգելվի գլխաշորերով գլուխը փաթաթել։ Դա առաջին հերթին վերաբերում է հիջաբին, բայց կարող է վերաբերել նաեւ թյուրբանին։ Սիկխերի համայնքի ներկայացուցչի խոսքերով՝ որեւէ երկրում դեռ թյուրբանը չեն արգելել։ Ըստ նրա՝ թյուրբանը հարգանք է Աստծո հանդեպ եւ իրենց կրոնի «կարեւոր տարբերիչ նշանն է»։
Այժմ Ավստրիայում մոտ 15 հազար սիկխ է ապրում, սակայն նրանց կրոնական համայնքը պաշտոնապես ճանաչված չէ։ Սիկխերը անհավանական են համարում, որ ցածր դասարանի տղաները թյուրբան չկրեն։
2017թ․ հոկտեմբերի 1-ից Ավստրիայում արգելվել են փարանջան, բուրկան եւ նիկաբը։