Մեքսիկան սկսել է արտաքսել այն միգրանտներին, ովքեր փորձել են ԱՄՆ փախչել
100 միգրանտների առաջին խումբը, որ փորձել էր փախչել Ամերիկա, արտաքսվում է Մեքսիկայից։ Այս մասին հայտարարել է Մեքսիկայի Միգրացիայի ազգային ինստիտուտի ներկայացուցիչ Խերարդո Գարսիան՝ տեղեկացնում է ՌԻԱ Նովոստին։
Գարսիայի խոսքերով՝ խոսքը 98 միգրանտների մասին է։ Կիրակի օրը Թիխուանա քաղաքի շրջանում բռնությամբ ԱՄՆ ներխուժել փորձողների թիվը 500 է։ Նույն օրը մեքսիկական իշխանությունները խոստացել էին արտաքսել բոլորին։
Formula ռադիոյի եթերում ինստիտուտի ներկայացուցիչն ասել է, որ այդ մարդիկ արդեն դեպի Գվատեմալա են գնում, որպեսզի սահմանից արտաքսվեն։
Մեքսիկայի ՆԳՆ-ն նախօրեին հայտնել էր, որ այժմ երկրի տարածքում ավելի քան 8,2 հազար միգրանտներ կան, որոնց մեծ մասը գտնվում են Թիխուանայի եւ Մեխիկալիի սահմաններին։ Նրանցից 2 հազարը համաձայնել են, որ մեքսիկական իշխանությունները օգնեն իրենց վերադառնալ տուն։