Ադրբեջանցի դիվանագետները Ուկրաինայում հայտնվել են սկանդալի կիզակետում

Ուկրաինայում ադրբեջանցի դիվանագետները հայտնվել են իսկական սկանդալի կիզակետում: Երկրում Ադրբեջանի նախկին դեսպան Թալեաթ Ալիևը (2001–2010) նոր դեսպան Ազեր Խուդիևի կողմից մեղադրվում է 1,85 մլն դոլարի յուրացման համար:

Ինչպես գրում է ադրբեջանական minval.az կայքը, նախկին դեսպանը հերքել է դեսպանատան շենքի նորոգման ժամանակ գումարների յուրացման մասին իրեն ուղղված մեղադրանքներն ու պնդում է, որ Խուդիևն ուղղակի վրեժ է լուծում իրենից անցյալում ունեցած անձնական անախորժությունների պատճառով:

Ալիևը պատմել է, որ դեսպան եղած տարիներին Խուդիևն իր դիվանագետների շարքում էր, ըստ նախկին դեսպանի՝ Խուդիևը երբեմն ոչ ադեկվատ է պահել իրեն, ինչի հետևանքով նա ստիպված է եղել համապատասխան բողոք հղել Ադրբեջանի արտգործնախարարությանը:

Իսկ ինչ վերաբերում է դեսպանության նորոգված շենքի պատերին առաջացած ճաքերին՝ Ալիևը պնդել է, որ դրանք պայմանավորված են այդ տարածքին բնորոշ սողանքներով, ինչպես նաև դեսպանատան հարևանությամբ բարձրահարկ շենքի կառուցմամբ, որի դեմ ինքը պայքարել է: