Ամերիկյան իշխանությունները դատի են տվել Իլոն Մասկին խարդախության համար

ԱՄՆ-ի Արժեթղթերի և բորսաների հանձնաժողովը դատի է տվել Tesla-ի հիմնադիր ու ղեկավար Իլոն Մասկին՝ մեղադրելով նրան ընկերության բոլոր բաժնետոմսերը գնելու համար բավարար գումար ունենալու մասին հայտարարությամբ բաժնետերերին մոլորեցնելու համար:

Ինչպես հաղորդում է The Wall Street Journal-ը, ամերիկյան օրենսդրությունն արգելում է այդ տիպի ընկերությունների ղեկավարներին կեղծ հայտարարություններ անել, որոնք կարող են ազդել ներդրողների հետագա քայլերի վրա:

Հանձնաժողովի ներկայացրած բողոքի համաձայն՝ Tesla-ի բաժնետոմսերը գնելու մասին հայտարարություններ անելով, Մասկը չի հաստատել առանցքային համաձայնագրի պայմանները, այդ թվում՝ գներն ու ֆինանսավորման հնարավոր աղբյուրը:

Այս բողոքին ի պատասխան՝ Մասկը հայտարարել է, որ համարում է մեղադրանքը անհիմն և խիստ հիասթափված է: «Ես միշտ գործել եմ՝ ելնելով ճշմարտության, թափանցիկության և ներդրողների շահերից:

Իմ կյանքի կարևորագույն արժեքն անկեղծությունն է և փաստերը ցույց կտան, որ ես ոչ մի դեպքում չեմ վարկաբեկի այն»,- հայտարարել է Մասկը: