Արեւմտյան հատուկ ծառայությունները գրանցել են Իրանից Լիբանան զենքի մատակարարումը
Արեւմտյան հետախուզական ծառայությունների աշխատակիցների ենթադրությամբ՝ վերջին ամիսներին իրանական ավիաընկերությունն իրականացրել է Թեհրանից Բեյրութ զենքի եւ այն արտադրելու բաղադրիչների մատակարարում, հայտնում է Fox News-ը:
Հեռուստաալիքի աղբյուրների պնդմամբ՝ հայտնաբերվել է Qeshm Fars Air ավիաընկերության երկու կասկածահարույց ավիաչվերթ: Առաջին օդանավը՝ Boeing 747, իբր օդ է բարձրացել հուլիսի 9-ին Թեհրանում ՌՕՈՒ բազայից: Այն վայրէջք է կատարել Դամասկոսում, իսկ այնուհետեւ «ոչ սովորական երթուղով» ժամանել է Բեյրութի միջազգային օդանավակայան: Աղբյուրների վարկածով՝ օդանավը տեղափոխել է «Լիբանանում իրանական գործարաններում բարձրճշգրտության զենքի արտադրության բաղադրամասեր»:
Երկրորդ օդանավն իբր թռչել է Թեհրանի օդանավակայանից եւ Բեյրութ է ժամանել օգոստոսի 2-ին: Այն Դամասկոս չի մտել, սակայն «հետեւել է Սիրիայից հյուսիս փոքր-ինչ անսովոր երթուղու»: Հեռուստաալիքի պնդմամբ՝ զենքը նախատեսված էր, մասնավորապես, «Հիզբոլլահ» շարժման համար:
ԱՄՆ-ն եւ նրա դաշնակիցները նախկինում Իրանին բազմիցս մեղադրել են այլ պետությունների գործերին միջամտելու, ահաբեկչական խմբավորումներին ֆինանսավորելու եւ զենք մատակարարելու մեջ: Վաշինգթոնը հայտարարել էր Թեհրանի վրա աննախադեպ ճնշում գործադրելու պատրաստակամության մասին, այդ թվում պատժամիջոցների խիստ ռեժիմ սահմանելով, եթե Իրանը չփոխի քաղաքական կուրսը: