Մոնիկա Լևինսկին Քլինթոնի մասին հարցից հետո դադարեցրել է հարցազրույցը

Հանրային-քաղաքական սկանդալի մասնակից Մոնիկա Լևինսկին (սկանդալը տեղի է ունեցել ԱՄՆ նախկին նախագահ Բիլ Քլինթոնի հետ նրա սեռական կապի պատճառով) լքել է հարցազրույցը, երբ նրան հարցրել են, թե արդյոք ԱՄՆ նախկին նախագահից ներողություն ակնկալու՞մ է։ Այս մասին գրում է The Jerusalem Post-ը։

Պարբերականի տվյալներով՝ Լևինսկին Channel 2 հեռուստաալիքում մամուլի ասուլիսով է հանդես եկել, որտեղ պատմել է իր կյանքի մասին՝ Քլինթոնի հետ սեռական սկանդալից հետո։ «Հուզիչ» ելույթից հետո նա պետք է զրուցեր տեղի լուրերի հաղորդավար Յոնիթ Լևիի հետ։ Սակայն առաջին իսկ հարցից հետո՝ արդյոք նա Քլինթոնից ներողություն ակնկալու՞մ է, Լևինսկին լքել է հարցազրույցը։

«Ներեցե՛ք, ես դա չեմ կարող անել»,-ասել է նա՝ ստուդիան լքելուց առաջ։

Ավելի ուշ Twitter-ի իր էջում Լևինսկին Լևիին մեղադրել է այն բանում, որ նա իրեն մոլորեցրել է և հայտարարել, որ նախապես քննարկել են, թե ինչ հարցերի ինքը պետք է պատասխանի՝ հավելելով, որ այդ հարցն իրենց նախնական պայմանավորվածությանը չէր համապատասխանում: