Ֆինլանդիան Թրամփ-Պուտին հանդիպման օրերին կարող է սառեցնել Շենգենի համաձայնությունը

Միացյալ Նահանգների և Ռուսաստանի նախագահներ Դոնալդ Թրամփի և Վլադիմիր Պուտինի Հելսինքիում հուլիսի 16-ին կայանալիք հանդիպմանը նախորդող և հաջորդող օրերին Ֆինլանդիան մտադիր է միառժամանակ վերականգնել սահմանների հսկողությունը Շենգենի գոտու երկրների հետ:

Այդ մասին հայտնել է Ֆինլանդիայի ներքին գործերի նախարարության բարձրաստիճան պաշտոնյա Կիմմո Էլոմաան:

Նրա փոխանցմամբ, այդ ժամանակավոր որոշման նպատակը երկու նախագահների անվտանգությունը երաշխավորելն ու հնարավոր օրինազանցությունները կանխելն է:

Ենթադրվում է, որ սահմանների հսկողությունը վերականգնելու որոշումը կգործի հուլիսի 13-ից հուլիսի 17-ը:

Դոնալդ Թրամփը հուլիսի 15-ին է ժամանելու Հելսինքի, իսկ Վլադիմիր Պուտինը՝ հուլիսի 16-ին:

Բնապահպանության, խաղաղության, մարդու իրավունքների և դեմոկրատիայի պաշտպանության խնդիրներով զբաղվող մի շարք հասարակական կազմակերպություններ արդեն հայտնել են, որ հուլիսի 15-ին բողոքի միջոցառումներ են կազմակերպելու Հելսինքիում:

Շենգենի գոտում ընդգրկված եվրոպական 26 պետությունների քաղաքացիները կարող են այդ տարածքում տեղաշարժվել առանց անձը վավերացնող փաստաթղթերի:

ԵԱՀԿ-ի 2008 թվականի գագաթնաժողովի օրերին Ֆինլանդիան ժամանակավոր վերականգնել էր սահմանների հսկողությունը: