Իրանն արգելել է ավելի քան 1.300 ապրանքի ներկրումը
Իրանի իշխանություններն արգելել են ավելի քան 1.300 ապրանքի ներկրումը, ինչը պայմանավորված է Միացյալ Նահանգների կողմից պատժամիջոցների սահմանմամբ ու ազգային արժույթի արժեզրկմամբ:
Ինչպես նշում է The Guardian-ը, արդյունաբերության և առևտրի հարցերով նախարար Մոհամադ Շարիաթմադարին արգելել է 1.339 անուն ապրանքատեսակի ներկրումը՝ հայտարարելով, որ դրանք հնարավոր է արտադրել Իրանում:
Արգելված ապրանքների թվում են կահույքը, սարքավորումները, տեքստիլը, կոշկեղենը, կաշվե իրերը, տան հարդարման պարագաները:
Աղբյուրը նկատում է, որ որոշումը կայացվել է մայրաքաղաք Թեհրանում առևտրականների կողմից կտրուկ գնաճի ու ազգային արժույթի արժեզրկման դեմ կազմակերպված զանգվածային բողոքի ակցիայի ֆոնին:
Ներկայում իրանական ռիալն անկում է արձանագրում, ինչը խոչընդոտում է բիզնեսի զարգացմանն ու զգալի ավելացնում ներկրման ծախսերը:
Հայտնի է, որ բողոքի ցույց ձեռնարկած առևտրականների մեծ մասը փակել է խանութները:
«Մենք բողոքում ենք տնտեսական իրավիճակից, չենք կարող շարունակել մեր բիզնեսը նման պայմաններում»,-ասել է ցուցարարներից մեկը: