G7-ի անդամները որոշել են Ռուսաստանի գործողություններին արագ արձագանքման խումբ ստեղծել

«Մեծ յոթնյակի» գագաթնաժողովի մասնակիցները պայմանավորվել են Ռուսաստանի գործողություններին արագ արձագանքման խումբ ստեղծել: Ինչպես գրում է The Guardian-ը, կառույցը կընդգրկի լայն շրջանակ՝ կիբեռհարձակումներից մինչև թունավորումներ:

Խմբի ստեղծման նախաձեռնող է հանդես եկել Մեծ Բրիտանիայի վարչապետ Թերեզա Մեյը, որն անհամաձայնություն է հայտնել G8 ձևաչափին վերադառնալու ԱՄՆ նախագահ Դոնալդ Թրամփի առաջարկին, որով նախատեսվում է գագաթնաժողովին Ռուսաստանի մասնակցությունը: Մեյի պնդմամբ՝ Մոսկվայի վերաբերյալ իր դիրքորոշումը «Ռուսաստանի հետ գործ ունենալն է, սակայն նաև զգուշանալը»:

Նախաձեռնության նպատակներից մեկը «գործընկեր երկրների քաղաքականության ըմբռնման բարելավումն է՝ սպառնալիքներին պատասխան միջոցների ձեռնարկման համար»: Դրա համար առաջարկվում է ընդլայնել պոտենցիալ սպառնալիքների և դրանց դեմ պայքարի մեթոդների մասին տեղեկատվության փոխանակման ծավալները:

«Մենք դառնում ենք կազմակերպված, և… մենք ձեռնարկում ենք համակարգված գործողություններ նրանց դեմ, ովքեր ձգտում են խախտել միջազգային համակարգի կանոնները»,- ասել է նա:

«Մեծ ութնյակ»-ը, որն իրենից ներկայացնում է տնտեսապես զարգացած պետությունների միություն, հիմնվել է 1998թ.: Սակայն 2014թ. Ղրիմի՝ Ռուսաստանի կազմում ներառվելու հետևանքով, ՌԴ-ն հեռացվել է միությունից, ինչի հետևանքով G8-ը դարձել է G7: Այժմ դրան անդամակցում են ԱՄՆ-ն, Կանադան, Մեծ Բրիտանիան, Ֆրանսիան, Գերմանիան, Իտալիան ու Ճապոնիան: