Ղրղզստանի նախկին ղեկավարները կարող են մեղադրյալների աթոռին հայտնվել

Ղրղզստանի նախագահ Սոորոնբայ Ժեենբեկովը հունիսի 6-10-ը պետական այցով Չինաստան կմեկնի, որտեղ հանդիպում կունենա Չինաստանի ղեկավար Սի Ձինփինի հետ: Բանակցությունների ընթացքում Ղրղզստանի նախագահը պետք է քննարկի Ղրղզստանի պաշտոնատար անձանց նկատմամբ բոլորովին վերջերս հարուցված կոռուպցիայի առնչությամբ քրեական գործերում ներգրավված համատեղ նախագծերի իրականացման հարցը, գրում է «Независимая Газета»-ն:

Փորձագետների կարծիքով՝ չինական կողմին նախևառաջ անհանգստացնում է այդ նախագծերին մասնակցող չինական ընկերությունների և անկասկած՝ հենց պետության հեղինակությունը:

Կոռուպցիոն սկանդալներին, ըստ երևույթին, ներգրավված է Ղրղզստանի ամբողջ նախկին ղեկավարությունը: Նախկին նախագահ Ալմազբեկ Աթամբաևին պատասխանատվության կանչել խանգարում է միայն Սահմանադրությամբ երաշխավորված անձեռնմխելիությունը:

Տվյալների համաձայն՝ պատգամավորները փնտրում են ամենահարմար տարբերակը Սահմանադրության այդ կետը փոխելու համար:

Այսօրվա դրությամբ, կոռուպցիայի մեղադրանքներ են պաշտոնապես առաջադրվել նախկին վարչապետ Սափար Իսակովին, Բիշքեքի քաղաքապետ Կուբանիչբեկ Կուլմատովին և այլ պաշտոնատար անձանց:

Իրավապահ մարմինների տեղեկություններով՝ Իսակովը 2013 թվականին, լինելով նախագահի աշխատակազմի ղեկավարի տեղակալ, «Բիշքեքի ՋԷԿ-ի արդիականացում» նախագծի իրականացման ժամանակ օգտագործել է իր քաղաքական դիրքը և առաջ է տարել օտարերկրյա ընկերության շահերը, ինչի հետևանքով առանձնակի խոշոր չափերի վնաս է հասցվել պետության և հասարակության շահերին:

Կայքը հիշեցնում է, որ 2017 թվականի հունվարին շահագործման հանձնված Բիշքեքի ՋԵԿ-ը, որի արդիականացման նախագիծն իրականացնում էր չինական TBEA ընկերությունը և որի համար 386 միլիոն դոլարի վարկ էր հատկացրել չինական «Էքսիմբանկ»-ը, արդեն հունվարին վթարի է ենթարկվել՝ քաղաքի բնակիչներին մեկ շաբաթով առանց ջերմամատակարարման և էլեկտրաէներգիայի թողնելով: