The Guardian-ը պատմել է Թրամփի և ադրբեջանցի օլիգարխ Աղալարովի կապի մասին

Բրիտանական The Guardian պարբերականը հերթական անդրադարձն է կատարել ԱՄՆ նախագահ Դոնալդ Թրամփի՝ Ռուսաստանի իշխանությունների հետ ունեցած վիճահարույց կապի թեմային՝ նկատելով, որ այդ ամենը շատ նման է մաֆիայի մասին պատմության:

Հոդվածագիր Չարլզ Կայզերը ուշագրավ վերլուծություն է արել՝ հիմնվելով Սեթ Հեթենայի «Թրամփ-Ռուսաստան. հավաստնի պատմություն» խորագրով նոր գրքին:

Հոդվածագիրը նշում է, որ նոր գրքում հետաքրքիր բացահայտումներ են արվում ռուսական մաֆիայի ներկայացուցիչների ու Թրամփի միջև գաղտնի գործնական կապերի մասին:

«Իհարկե, Թրամփը հանցավոր աշխարհի հետ առնչություններ ունեցող առաջին նախագահը չէ, սակայն նա ակնհայտորեն առաջինն է, ով օգուտ է քաղում այլ պետության կառավարության հետ կապված մաֆիոզիների հետ բազմաթիվ կապերից»,-նշում է հեղինակը՝ հավելելով, որ այդ մարդկանց անմիջական ներգրավվածությամբ է Թրամփը 2013թ. «Միսս տիեզերք» գեղեցկության մրցույթն անցկացրել Մոսկվայում, ինչպես նաև ավելի ուշ քննարկել է 2016թ. նախագահական ընտրություններում դեմոկրատ Հիլարի Քլինթոնի վրա «կեղտ լցնելու» հարցը:

Այս համատեքստում նշվում է մոսկվայաբնակ ադրբեջանցի օլիգարխ Արազ Աղալարովի անունը, որը Թրամփին 20 մլն դոլար էր վճարել մրցույթը Մոսկվայում անցկացնելու համար: Դրան ի պատասխան Թրամփը թույլ էր տվել, որպեսզի գործարարի որդին՝ Էմին Աղալարովը, 10 րոպեանոց ելույթ ունենա մրցույթի բեմին, ինչը կնպաստեր Արևմուտքում նրա ճանաչմանը:

Ավելի ուշ Էմին Աղալարովի վստահված անձը կապվել է Թրամփի որդու՝ Դոնալդ Թրամփ-կրտսերի հետ ու տեղեկացրել, որ Արազ Աղալարովը հանդիպել է ռուսական իշխանությունների ներկայացուցիչներին ու պարզել, որ նրանք պատրաստ են Թրամփին առաջարկել Հիլարի Քլինթոնի նախընտրական քարոզարշավի համար վտանգավոր տեղեկություն:

Հեղինակը հավելում է, որ Թրամփ-Ռուսաստան կապի վերաբերյալ փաստերն այնքան շատ են, որ կարելի է խճճվել: Հայտնի է, որ տարիներ առաջ ապագա նախագահը գտնվող Trump World Tower երկնաքերի 76-83-րդ հարկերում գտնվող տարածքների մեծ մասը վաճառել է Ռուսաստանի և ԱՊՀ շրջանակում դրա դաշնակից պետությունների հետ կապ ունեցող ընկերություններին:

Ինչ վերաբերում է 2013թ. Մոսկվա կատարած այցի ժամանակ Ritz Carlton շքեղ հյուրանոցի համարներից մեկում ռուս մարմնավաճառների հետ զվարճանալու մասին պնդմանը, հեղինակը մեջբերում է հայտնի լրտեսական վեպերի հեղինակ Ջոն լը Կարիի տեսակետը: Վերջինը չի բացառում, որ դա իրականությանը համապատասխանում է:

«Շատ հնարավոր է, որ Թրամփը պանրի թակարդն է ընկել. Նրա համար կանանց են բերել, և նա իրեն Ռուսաստանում ոչ պատշաճ է պահել»,-եզրափակել է Կարին: