ՌԴ-ում Telegram-ից հետո կարող է արգելափակվել Viber-ը
Ռուսաստանում Viber հաղորդագրային ծառայության դեմ կարող են նույնպիսի միջոցներ ձեռնարկվել, ինչպիսիք ձեռնարկվել են Telegram-ի դեմ, եթե հատուկ ծառայությունները չստանան գաղտնագրման բանալիները: Այդ մասին հայտարարել է ՌԴ կապի նախարար Նիկոլայ Նիկիֆորովը, հայտնում է ТАСС-ը:
«Դա Անվտանգության դաշնային ծառայությանն ուղղված հարց է, որովհետև գաղտնագրման բանալիների տրամադրման վերաբերյալ հրահանգները կատարելու լիազորությունները պատկանում են Անվտանգության դաշնային ծառայությանը: Եթե նրանց մոտ խնդիրներ առաջանան գաղտնագրման բանալիների տրամադրման հետ կապված, նրանք կարող են դիմել դատարան և ստանալ համապատասխան դատական որոշում»,-ասել է նախարարը:
Ռուսաստանում իշխանություններն ապրիլի 16-ից փորձում են արգելափակել Telegram-ի աշխատանքը: Հաղորդագրային ծառայության արգելքի մասին որոշումը ապրիլի 13-ին կայացրել է Մոսկվայի Տագանսկի դատարանը:
Մարտին Viber Media S.a.r.I. ընկերության օպերացիոն տնօրեն Մայքլ Շմիլովը հայտնել էր, որ Viber-ի թիմը չի կարողանա կատարել անվտանգության բանալիների տրամադրման մասին պահանջը: Նա պարզաբանել էր, որ իր ընկերությունը համագործակցում է աշխարհի տարբեր երկրների իրավապահ մարմինների հետ, սակայն ոչ մեկին չի կարող փոխանցել գաղտնագրման բանալիները, քանի որ Viber-ի հիմնական գործառույթները պաշտպանված են end-to-end մեխանիզմով, որի դեպքում բանալիները պահվում են միայն հաճախորդների սարքերի վրա: