ՌԴ ԱԴԾ-ն ահաբեկչություն է կանխել Սարատովի առևտրի կենտրոնում

Մարտին Ռուսաստանի Դաշնության Անվտանգության դաշնային ծառայությունն ահաբեկչական ակտ է կանխել Սարատով քաղաքի առևտրի կենտրոններից մեկում: Այս մասին հայտնում է «РИА Новости»-ն՝ հղում անելով ԱԴԾ-ի տնօրեն Ալեքսանդր Բորտնիկովին:

Աղբյուրը մանրամասնում է, որ ուժայինները ոչնչացրել են ահաբեկչության կազմակերպիչներին ձերբակալության փորձի ժամանակ: «Իսլամական պետություն» ահաբեկչական խմբավորման անդամների մոտ զենք ու պայթուցիկ նյութ է հայտնաբերվել, որի հոզորությունը տրոտիլային համարժեքով մոտ 3 կգ է եղել:

Դրանից բացի, հատուկ ծառայությունների աշխատակիցներին հաջողվել է ՌԴ նախագահական ընտրությունների օրը երկու ահաբեկչություն կանխել ընտրատեղամասերում: Հարձակումներից մեկը պլանավորվում էր Ինգուշեթիայում, մյուսը՝ Բաշկիրիայում:

Բորտնիկովի խոսքով, ընդհանուր առմամբ, առաջին եռամսյակում ուժայինները 6 ահաբեկչական ակտ են կանխել ու 12 ավազակախումբ ոչնչացրել:

Հատուկ ծառայության աշխատակիցները ձերբակալել են 189 և ոչնչացրել 15 «ավազակի ու նրանց աջակիցներին»: