Թրամփը ծրագրում է հասնել թմրավաճառների համար բարձրագույն պատժաչափի
ԱՄՆ նախագահ Դոնալդ Թրամփը մտադիր է երկուշաբթի ներկայացնել, այսպես կոչված, Միացյալ Նահանգներում ափիոնային ճգնաժամի դեմ պայքարի նոր ծրագիրը, որի համաձան՝ կքննարկվի նաեւ թմրավաճռների համար բարձրագույն պատժաչափի հարցը: Այս մասին լրագրողների հայտնել է Սպիտակ տան ներքին անվտանգության հարցերով տնօրեն Էնդրյու Բրեմբերգը, հայտնում է Politico-ն:
«Արդարադատության նախարարությունը կփորձի հասնել թմրավաճառների համար բարձրագույն պատժաչափին»,- ասել է նա: Նշվում է, որ Թրամփը այս մասին կհայտարարի երկուշաբթի Նյու Հեմփշիր նահանգում ելույթ ունենալիս, որը ԱՄՆ-ում ափիոնայինների գերդոզավորման հետեւանքով մահացությամբ երրորդ տեղն է զբաղեցնում:
Ափիոնային ճգնաժամը, որը համարում են ԱՄՆ առողջապահության ոլորտի կարեւորագույն խնդիրներից մեկը, սկիզբ է առել 1990-ական թվականներից, սակայն մինչեւ հիմա թմրամիջոցների դեմ պայքարի միասնական ռազմավարություն չի մշակվել: Բժշկական STAT պարբերականի գնահատմամբ՝ եթե շտապ միջոցներ չձեռնարկվեն, ԱՄՆ-ում հաջորդ 10 տարիներին ափիոնայինների գերդոզավորումից կարող է մահանալ մոտ 500 հազար մարդ: 1980 թվականից մինչեւ հիմա գրեթե նույնքան ամերիկացիներ են մահացել մարդու իմունոդեֆիցիտի վիրուսի հետեւանքով:
2017-ի գարնանը Թրամփը կարգադրել էր երկրում ափիոնային ճգնաժամի դեմ պայքարի ԱՄՆ նախագահական հանձնաժողով ստեղծել, իսկ հոկտեմբերի 26-ին ափիոնային ճգնաժամին տվել էր առողջապահության ոլորտում արտակարգ իրավիճակի կարգավիճակ, ինչը նախատեսում է թմրակախվածություն ունեցողներին օգնության ցուցաբերման համալիր միջոցառումների ընդունում եւ պայքար սեւ շուկայում այս խմբի թմրամիջոցների տարածման դեմ: