ԵՄ-ն Թուրքիային 3 մլրդ եվրո կտրամադրի

Եվրոպական հանձնաժողովը սկսում է Թուրքիայում բնակվող սիրիացի ներգաղթյալների ծախսերը հոգալու համար այդ երկրին 3 մլրդ եվրոյի չափով դրամական օգնության տրամադրման գործընթացը, որը նախատեսված է 2016 թվականի մարտին Եվրամիության և Թուրքիայի միջև կնքված միգրացիոն համաձայնագրով, գրում է BBC-ի թուրքական ծառայությունը։

Նշենք, որ սա 3 մլրդ եվրոյի չափով 2-րդ օգնությունն է։

Եվրահանձնաժողովի նախագահ Ժան-Կլոդ Յունկերը, Եվրախորհրդի նախագահ Դոնալդ Տուսկը և Եվրոպայի խորհրդում նախագահող Բուլղարիայի վարչապետ Բոյկո Բորիսովը մարտի 26-ին բուլղարական Վառնա քաղաքում հանդիպում կունենան Թուրքիայի նախագահ Ռեջեփ Թայիփ Էրդողանի հետ։

Անկարայի և Բրյուսելի միջև համաձայնագիրը կնքվել է 2016-ի մարտին և ուղղված է փախստականների անվերահսկելի հոսքը դեպի Եվրոպա մեղմելուն: Սիրիայից Թուրքիա ժամանած փախստականներին Եվրամիությունը պարտավորվել էր պահել սեփական միջոցներով, որը փոխանցվում է Թուրքիային: