ԱՄՆ-ում զույգը ծաղկեփնջերի փոխարեն փողոցում գտած շան ձագեր է բերել հարսանիքին (լուսանկարներ)
Ծաղկեփնջերը ցանկացած հարսանեկան արարողության անբաժանելի մասն են, և նորապսակները հատուկ ուշադրություն են դարձնում ծաղիկների ընտրությանն ու դիզայնին:
Սակայն այս հարցում նույնպես բացառություններ են լինում: Այսպես, ԱՄՆ-ի Կենտուկի նահանգի բնակիչներ Բեքին և Ջոնը ծաղկեփնջերի փոխարեն շան ձագեր են բերել իրենց հարսանիքին:
Bored Panda-ն գրում է, որ հարսանիքը պլանավորելու ժամանակ նրանք պատահաբար հայտարարություն են տեսել համացանցում, որում առաջարկվում էր որդեգրել փողոցում գտած շան ձագերին: Զույգն առանց երկար-բարակ մտածելու վերցրել է սկզբում երկու, այնուհետ ևս երեք շան ձագ՝ մտադիր լինելով ժամանակավոր տուն դառնալ նրանց համար:
«Մենք խոզուկներ ու կովեր մեծացնելու փորձ ունենք, ու մտածեցինք, որ շուն պահելը շատ չի տարբերվի», - ասել են Բեքին և Ջոնը:
Շան ձագերն այնքան փոքր էին, որ զույգը չէր կարող թողնել նրանց տանը. երիտասարդներն ամենուր իրենց հետ վերցնում էին կենդանիներին:
Հենց այսպես էլ ծագել է շներին ծաղկեփնջերի փոխարեն հարսանիքի տանելու գաղափարը, որն անչափ ոգևորել և ուրախացրել է արարողության հյուրերին. մարդիկ մեծ հաճույքով գրկել և լուսանկարվել են շների հետ:
Նշվում է, որ Բեքիի և Ջոնի հարսանիքից հետո բոլոր հինգ ձագերը բաժանվել են ընտանիքների, որոնք երազում էին շուն պահել:
