Անցած գիշեր Իրանում կրկին հակակառավարական ցույցեր են տեղի ունեցել (տեսանյութ)
Նախորդ գիշեր Իրանի տարբեր քաղաքներում կրկին հակակառավարական ցույցեր են անցկացվել, ինչի մասին վկայում են համացանցում տարածված տեսանյութերը:
Ինչպես նշում է Al Arabiya-ն, բողոքի ակցիաներն անցկացվել են հարավային Բենդեր Աբաս, կենտրոնական Նաջաֆաբադ, Շիրազ և հարավ-արևելյան Քերման քաղաքներում:
Մասնավորապես՝ Բենդեր Աբասում ցուցարարները կոչ են արել մյուսներին ևս իրենց միանալ, իսկ Շիրազում նրանք վանկարկել են՝ «մա՛հ բռնապետին»: Աղբյուրը մանրամասնում է, որ ցուցարարները, բռնապետ ասելով, նկատի են ունեցել երկրի գերագույն հոգևոր առաջնորդ այաթոլլահ Ալի Խամենեին:
Ինչ վերաբերում է Նաջաֆաբադին, ապա ցուցարարները ռեժիմի դեմ ուղղված վանկարկումներ են հնչեցրել, իսկ Քերմանում անվտանգության ուժերին կոչ են արել չխոչընդոտել իրենց ակցիային:
Հիշեցնենք, որ դեկտեմբերի վերջին Իրանում սկիզբ են առել 2009թ. ի վեր ամենալայնածավալ հակակառավարական ցույցերը, որոնք շարունակվել են մի քանի օր, ուղեկցվել են զանգվածային փողոցային անկարգություններով ու դարձել բազմաթիվ մարդկային կորուստների պատճառ:
Տեսանյութը կարող եք դիտել այստեղ: