«Պորտաբույծներն» այլեւս չեն հարկվի
Բելառուսի նախագահ Ալեքսանդր Լուկաշենկոն հրամանագիր է ստորագրել, որը ազատում է երկրի գործազուրկներին բյուջետային վճարումներից: Սակայն այժմ նրանք կարող են զրկվել մի շարք նպաստներից: Այս մասին տեղեկացնում է Բելառուսի նախագահի պաշտոնական կայքը:
Նոր հրամանագիրը բնակչության աշխատանքային ակտիվության խթանման այլ ձեւեր է ենթադրում: Այդպես, հատուկ հանձնաժողովները պետք է «կազմակերպեն քաղաքացիների ուսուցումն ու զբաղվածությունը»: Իսկ Բելառուսի աշխատունակ գործազուրկները կարող են զրկվել նպաստներից կոմունալ վճարումների, դեղորայքի եւ կրթության համար:
Բելառուսի Նախագահի հրամանագիրը, որը ժողովրդի շրջանում պորտաբուծության դեմ պայքարի հրամանագիր էր անվանվել, ստորագրվել էր 2015 թվականի ապրիլին, որի համաձայն գործազուրկ աշխատունակ քաղաքացիները ստիպված էին տարեկան մոտ 230 եվրո վճարել: 2017 թվականի փետրվար եւ մարտ ամիսներին երկրի խոշոր քաղաքներում այս հրամանագրի դեմ բողոքի ցույցեր անցկացվեցին: Ավելի ուշ Բելառուսի իշխանությունները հետաձգեցին հարկի վճարումը: