ԵԽԽՎ նախագահ է ընտրվել իտալացի Միկելե Նիկոլետտին

Եվրոպայի խորհրդի խորհրդարանական վեհաժողովի (ԵԽԽՎ) նախագահ է ընտրվել իտալացի Միկելե Նիկոլետտին: Այս մասին գրում է Kommersant-ը:

Նրա թեկնածությունը հաստատվել է ԵԽԽՎ-ի ձմեռային նստաշրջանի բացման արարողության ժամանակ, որը կայացել է Ստրասբուրգում այսօր:

Նրա անունը միակն էր մնացել թեկնածուների ցանկում: Նիկոլետտին ԵԽԽՎ նախագահի պաշտոնը կզբաղեցնի մեկ տարի: Նա մեկ անգամ կկարողանա երկարաձգել պաշտոնավարումը:

ԵԽԽՎ-ում հայկական պատվիրակության նախկին անդամ Նաիրա Կարապետյանի խոսքով, անձամբ ճանաչելով Նիկոլետտիին վստահորեն կարող է փաստել, որ նման սկզբունքային, լուրջ, օբյեկտիվ, արդար և խիստ հավասարակշռված մարդը բարձր է պահելու Վեհաժողովի վարկանիշը։

«Բարձր դասելով ժողովրդավարական սկզբունքները, Նիկոլետտին առաջիններից մեկն էր, որ ընդվզեց կոռուպցիայի մեջ թաղված Ագրամունտի դեմ, նախաձեռնելով Վեհաժողովի առողջացմանն ու ինքնամաքրմանը տանող մի շարք քայլեր։ Ի սրտե հաջողություն եմ մաղթում ԵԽԽՎ նոր նախագահին»,- facebook-յան իր էջում գրառել է Կարապետյանը:

Նշենք, այսօր Ստրասբուրգում մեկնարկել է ԵԽԽՎ ձմեռային նստաշրջանը, որի ընթացքում ելույթով հանդես կգա նաև ՀՀ նախագահ Սերժ Սարգսյանը:

Անցյալ տարի հոկտեմբերին Եվրոպայի խորհրդի խորհրդարանական վեհաժողովի նախագահ Պեդրո Ագրամունտը հրաժարական է տվել։ Այս մասին նա գրել էր Twitter-ի իր միկրոբլոգում։

«Անձնական պատճառներից ելնելով` ես որոշել եմ այլեւս չղեկավարել Եվրոպայի խորհրդի խորհրդարանական վեհաժողովը»,- գրել է նա։

Հիշեցնենք, Ագրամունտը հայտնվել էր սկանդալի կենտրոնում, այդ թվում՝ Ադրբեջանի խավիարային դիվանագիտության մեջ ներգրավված լինելու պատճառով։