Քաղաքացիները գազի սակագնի հնարավոր փոփոխության մասով այս պահին մտահոգվելու առիթ չունեն. ՏԿԵ նախարար

Այս մասին լրագրողների հետ զրույցում ասաց ՀՀ տարածքային կառավարման և ենթակառուցվածքների նախարար Դավիթ Խուդաթյանը՝ անդրադառնալով գազի սակագնի հնարավոր վերանայման մասին հրապարակումներին։

«Իմ տպավորությամբ՝ մամուլում մեկնաբանությունները շատ ավելի վատն են, քան իրականում գետնի վրա տեղի ունեցողը։ Գետնի վրա մենք բնականոն հունով գազամատակարարում ենք ստանում, ստանում ենք այն սակագնով, որը սահմանված է, աշխատում ենք գործընկերների հետ այնպես, ինչպես աշխատել ենք նախկինում։ Այսինքն՝ ավելացնելու, մեկնաբանելու բան չկա»,- ասաց Խուդաթյանը։

Լրագրողի հարցին՝ արդյոք գազի սակագնի վերանայման վերաբերյալ պաշտոնական որևէ դիմում կա՞, նախարարը պատասխանեց, որ սակագնի վերանայման մասով պաշտոնական այլ տեղեկատվություն չկա, քան այն, ինչն ավելի վաղ հրապարակվել էր մամուլում։

Հիշեցնենք, որ մայիսի 27-ին Ռուսաստանի էներգետիկայի նախարար Սերգեյ Ցիվիլյովը նամակ էր հղել Հայաստանի տարածքային կառավարման և ենթակառուցվածքների նախարարությանը։ Նամակում ռուսական կողմը Հայաստանին սպառնացել էր միակողմանիորեն կասեցնել կամ չեղյալ հայտարարել գազի, նավթամթերքի և չմշակված ադամանդի մատակարարումների մասին համաձայնագիրը, եթե Երևանը շարունակի ԵՄ անդամակցության գործընթացը։

«Ոչ, սակագնի վերանայման մասով պաշտոնական այլ տեղեկատվություն չկա, քան այն տեղեկատվությունը, ինչը հրապարակվել է մամուլում շուրջ մեկ ամիս առաջ։ Ռուսաստանի մեր գործընկեր նախարարության միջոցով ենք ստացել գրությունը այդ բովանդակությամբ, բայց նորից պիտի ասեմ՝ մենք մեր ռիսկերը կառավարում ենք, այդ թվում՝ սակագնի ավելացման մասով։ Թույլ տվեք շատ փակագծեր չբացել, բայց մեր ռիսկերը մենք կառավարում ենք, որովհետև պատկերն այնքան էլ այնպիսին չէ, ինչպիսին կարող է տպավորություն ստեղծվել առաջին հայացքից»,- նշեց ՏԿԵ նախարարը։

Անդրադառնալով հարցին, թե հնարավո՞ր է Հայաստանում գազի համար եվրոպական գներ սահմանվեն, Խուդաթյանը նշեց, որ չի կարող ասել, թե ինչ կլինի հետագայում, սակայն ընդգծեց, որ այս պահին քաղաքացիները մտահոգվելու առիթ չունեն։

«Չեմ կարող ասել՝ ինչ կստացվի։ Ես կարող եմ ասել, որ քաղաքացիները մտահոգվելու առիթ այս պահին այդ առումով չունեն»,- ասաց նախարարը։

Նա հավելեց, որ Հայաստանի գործող պայմանագրի ժամկետը լրանում է ձմռանից հետո, և այս պահին պայմանագրային հարաբերությունները բնականոն շարունակվում են։

Հիշեցնենք, որ 2013 թվականին Հայաստանի և Ռուսաստանի միջև ստորագրված համաձայնագրով Ռուսաստանը Հայաստանին գազ, նավթամթերք և չմշակված ադամանդներ է մատակարարում առանց արտահանման տուրքերի և ներքին սպառման հետ կապված արտոնյալ պայմաններով։ 

«Մենք պայմանագիր ունենք, և այդ պայմանագրի ժամկետը ձմռանից էլ հետո է լրանում։ Պայմանագիրը միակողմանի խզելու համար հիմքեր են պետք։ Մենք նորմալ աշխատում ենք, ստանում ենք գազը այն սակագնով, որով ստացել ենք, ստանում ենք գազային գրաֆիկով, որով ստացել ենք»,- ասաց Խուդաթյանը։

Նախարարի խոսքով՝ Ռուսաստանի գործընկերների հետ աշխատանքային հարաբերությունները շարունակում են մնալ լավ մակարդակի վրա, և այդ հարաբերություններում որևէ փոփոխություն չկա։

«Գործընկերների հետ ունենք շատ լավ աշխատանքային հարաբերություններ։ Մեր աշխատանքային հարաբերություններում ոչինչ չի փոխվել»,- նշեց նա։

Խուդաթյանը նաև հորդորեց չստեղծել տպավորություն, թե Հայաստանում որևէ մեկը շահագրգռված է գազի գնի բարձրացմամբ։

Ռուսաստանի նախագահի մամուլի քարտուղար Դմիտրի Պեսկովը մայիսի 25-ին հայտարարել էր, որ ռուսական գազի արտոնյալ գինը Հայաստանի համար կարող է ձևավորվել շուկայական հիմքի վրա, եթե Երևանը որոշի դուրս գալ Եվրասիական տնտեսական միությունից։