Սաակաշվիլին ՄԻԵԴ հայց կներկայացնի Ուկրաինայի անվտանգության ծառայության դեմ
Վրաստանի նախկին նախագահ, Օդեսայի շրջանի նախկին նահանգապետ Միխեիլ Սաակաշվիլին հայտարարել է, որ Ուկրաինայի անվտանգության ծառայության դեմ հայց կներկայացնի Մարդու իրավունքների եվրոպական դատարան։ Սաակաշվիլին պատրաստվում է դրամական փոխհատուցում պահանջել իր առևանգման համար, հաղորդում է RT հեռուստաալիքը:
«Ես կպահանջեմ փոխհատուցում իմ առևանգման համար: Երբ Ուկրաինայում փոխվի իշխանությունը՝ նրանք ստիպված են լինելու պատասխան տալ ոչ միայն այն ամենի համար, ինչ արել են ինձ հետ, այլև այն ամենի համար, ինչ ամեն օր անում են Ուկրաինայի քաղաքացիների հետ»- հայտարարել է Սաակաշվիլին:
Նա պնդում է, որ իր դեմ ձեռնարկված գործողություններն ավազակություն են և առևանգում:
Ինչպես ավելի վաղ հայտնել էր Tert.am-ը, դեկտեմբերի 11-ին Կիևի դատարանն ազատ է արձակել Միխեիլ Սաակաշվիլիին: Փաստացի դատավոր Լարիսա Ցոկոլը մերժել է դատախազության՝ տնային կալանքի մասին միջնորդությունը: Հիշեցնենք, որ Սաակաշվիլիին ձերբակալել էին դեկտեմբերի 5-ին: Նա ձերբակալվել էր հանցախմբերի անդամներին աջակցելու ու նրանց հանցավոր գործունեությունը քողարկելու մասին քրեական գործի շրջանակում: