Ալիևը զրկել է Նախիջևանին ինքնավարությունից և «Զանգեզուրի միջանցքի» բանակցություններում դեր ունենալուց

Ադրբեջանի նախագահ Իլհամ Ալիեւը հաստատել է Նախիջեւանի սահմանադրության փոփոխությունները։ Դրանք վերացնում են տարածքի ինքնավարության մեծ մասը՝ Ալիեւին տալով լիակատար վերահսկողություն տարածաշրջանի քաղաքական կյանքի նկատմամբ, իր սեփական ներկայացուցչին նշանակելով տարածաշրջանի ղեկավար, հաղորդել է Eurasia Review-ն։

Նոր կանոնների համաձայն՝ Նախիջեւանի կառավարությունը հաշվետու կլինի այս ներկայացուցչին, այլ ոչ թե տարածաշրջանի խորհրդարանին։ Բացի այդ, Ալիեւը հրամայել է «ներդաշնակեցնել» Նախիջեւանի օրենքները ողջ հանրապետության օրենքների հետ։

Իրավապաշտպան Յալչին Իմանովը նշել է, որ այս փոփոխությունները «փաստացի զրոյի են հասցնում Նախիջեւանի Ինքնավար Հանրապետության ինքնավարությունը եւ հակասում են նրա ինքնիշխանության սկզբունքներին», ցույց տալով, որ «Ադրբեջանի իշխանությունները շահագրգռված են ամբողջ իշխանությունը կենտրոնացնել մեկ անձի՝ նախագահի ձեռքում»։

Սակայն Ալիեւի ստորագրած վարչական փոփոխությունները կարող են էլ ավելի կարեւոր նշանակություն ունենալ։ Դրանք ենթադրում են, որ Նախիջեւանն ինքը որեւէ անմիջական դեր չի խաղա այսպես կոչված «Զանգեզուրի միջանցքի» բանակցություններում կամ TRIPP-ի մշակման գործում, եւ որ փոխարենը Բաքուն կլինի ադրբեջանական կողմից միակ մասնակիցը։