Առողջության ապահավոգրության վերաբերյալ հաճախ տրվող հարցեր․ նախարարության պարզաբանումը

1. Ե՞րբ է ներդրվելու առողջության համընդհանուր ապահովագրության համակարգը։

Առողջության համընդհանուր ապահովագրության համակարգը ներդրվելու է 2026 թվականի հունվարի 1-ից` փուլային տարբերակով:

2. Ո՞րն է տարբերությունը Առողջության համընդհանուր ապահովագրությամբ և պետպատվերով տրամադրվող բուժծառայությունների:

Տարբեր են թե՛ փաթեթի կառուցվածքով, թե՛ փոխհատուցման գներով:Սակայն ինչպես պետպատվերով տրամադրվող բուժծառայությունների դեպքում, այնպես էլ ապահովագրության դեպքում, ամեն ինչ սկսվում է առաջնային օղակից: Անհրաժեշտության դեպքում, ընտանեկան բժշկի կամ մանկաբույժի ուղեգրով կկազմակերպվի հետագա բուժումը` նեղ մասնագետի խորհրդատվությունից մինչև հիվանդանոցային բուժում` բացառությամբ շտապ և անհետաձգելի դեպքերի:

3. Ովքե՞ր են առաջին փուլով ընդգրկվելու ապահովագրական համակարգում։

Հայաստանի Հանրապետության քաղաքացի և ռեզիդենտ

• Մինչև 18 տարեկանները
• Առանց ծնողական խնամքի մնացած 18-23 տարեկանները
• Առանց ծնողական խնամքի մնացած առկա ուսուցմամբ սովորող մինչև 26 տարեկանները
• 65 + տարիքի քաղաքացիները
• Հաշմանդամության 1-3-րդ խումբ ունեցող քաղաքացիները, ֆունկցիոնալության խորը, ծանր, միջին սահմանափակում ունեցող անձինք
• Զոհված զինծառայողների ընտանիքների անդամները
• Չեռնոբիլի ատոմակայանի վթարի վերացման աշխատանքների մասնակիցները
• Համաշխարհային պատերազմի մասնակիցները և նրանց հավասարեցված անձինք
• Բռնադատվածները
• Հաշմանդամության զինվորական կենսաթոշակ ստացող նախկին զինծառայողները
• Հաշմանդամություն ունեցող երեխայի ծնողներից մեկը, որդեգրողը, խնամակալը կամ հոգաբարձուն
• Անապահովության միավոր կամ աստիճան ունեցող ընտանիքի անդամը՝ Կառավարության որոշմամբ սահմանված դեպքերում և կարգով
• 200 001 դրամ և ավելի աշխատավարձ ստացողները
• 2 400 001 դրամ և ավելի համախառն եկամուտ ունեցող ԱՁ-ներ և նոտարները:

4. Անհատ ձեռներեցները ընդգրկվելու՞ են ապահովագրության համակարգում:

Եթե ունեն 2 400 001 դրամ շրջանառություն և այդ մասին հաշվետվությունը ներկայացնեն մինչև 2026 թվականի ապրիլի 20-ը, նրանք կընդգրկվեն համակարգում: ԱՁ-ները ապահովագրավճարը պետք է վճարեն միանգամից տասներկու ամսվա համար, մինչև 2026 թվականի ապրիլի 20-ը:

5. Որքա՞ն է ապահովագրական փաթեթի արժեքը։

Ապահովագրական փաթեթը բոլորի համար նույնն է լինելու, արժեքը` տարեկան 129, 600 դրամ, ամսական` 10800 դրամ:

6. Ո՞ւմ համար է 2026 թվականին ապահովագրության գումարն ամբողջությամբ փոխհատուցվելու պետության կողմից։

• Մինչև 18 տարեկանների
• Առանց ծնողական խնամքի մնացած 18-23 տարեկանների
• Առանց ծնողական խնամքի մնացած առկա ուսուցմամբ սովորող մինչև 26 տարեկանների
• 65 + տարիքի քաղաքացիների
• Հաշմանդամության 1-3-րդ խումբ ունեցող քաղաքացիների, ֆունկցիոնալության խորը, ծանր, միջին սահմանափակում ունեցող անձանց
• Զոհված զինծառայողների ընտանիքների անդամների
• Չեռնոբիլի ատոմակայանի վթարի վերացման աշխատանքների մասնակիցների
• Համաշխարհային պատերազմի մասնակիցները և նրանց հավասարեցված անձանց
• Բռնադատվածների
• Հաշմանդամության զինվորական կենսաթոշակ ստացող նախկին զինծառայողների
• Հաշմանդամություն ունեցող երեխայի ծնողներից մեկի, որդեգրողի, խնամակալի կամ հոգաբարձուի
• Անապահովության միավոր կամ աստիճան ունեցող ընտանիքի անդամի՝ Կառավարության որոշմամբ սահմանված դեպքերում և կարգով

7. Ինչպե՞ս է փոխհատուցվելու ապահովագրավճարը 200 001 – 500 000 դրամ աշխատավարձ ստացողների համար։

200 001 դրամից մինչև 500 000 դրամ աշխատավարձ ստացողների ապահովագրավճարի գերակշիռ մասը 2026 թվականին պետության կողմից փոխհատուցվելու է: Մասնավորապես` «Զինապահ» հիմնադրամին հատկացվող 5500 դրամից 4500 դրամն ուղղվելու է Ապահովագրության հիմնադրամին։ 6000 դրամը փոխհատուցվելու է պետական բյուջեից: Այս խմբի քաղաքացիները վճարելու են ամսական ընդամենը 300 դրամ:

8. Ինչպե՞ս է փոխհատուցվելու 500 001 – 1 մլն դրամ աշխատավարձ ստացողների համար։

500 001 դրամից մինչև 1 մլն դրամ ստացող քաղաքացիների կողմից «Զինապահ» հիմնադրամին հատկացվող 8500 դրամից 7500 դրամն ուղղվելու է Ապահովագրության հիմնադրամին, մնացած 3300 դրամը պահվելու է իրենց աշխատավարձից, բայց 2027 թվականին այն ամբողջությամբ կարող են հետ ստանալ` ֆիզիկական անձանց հայտարարագրման համակարգով` որպես եկամտահարկի վերադարձ:

9. Մեկ միլիոն դրամ և ավելի աշխատավարձ ստացող քաղաքացիներից որքա՞ն գումար է ամսական պահվելու, և արդյո՞ք նրանք էլ կարող են օգտվել փոխհատուցումից:

Նրանք կշարունակեն «Զինապահ» հիմնադրամին հատկացնել 15 000 դրամ: Ամսական 10800 դրամ ապահովագրավճարը նրանք ամբողջովին վճարելու են, բայց հաջորդ տարի կարող են սոցկրեդիտով ամսական 4000 դրամ հետ ստանալ:

10. Սոցփաթեթի շահառուներն ընդգրկվելո՞ւ են ապահովագրական համակարգում։

Սոցփաթեթի այն շահառուները, որոնց աշխատավարձը 200 001 դրամ և ավելի է, առաջին փուլով (2026թ. հունվարի 1) կներառվեն ապահովագրական համակարգ: Նրանց ապահովագրավճարը ևս կփոխհատուցվի «Զինապահ» հիմնադրամին հատկացվող 5500 դրամից Ապահովագրության հիմնադրամին ուղղվող 4500 դրամով, ինչպես նաև կարող են իրենց սոցփաթեթի գումարը (ամսական 6000 դրամ) ևս ուղղել ապահովագրավճարին: Իսկ սոցփաթեթի այն շահառուները, որոնց աշխատավարձը 200 000 դրամից պակաս է, նրանք կշարունակեն սպասարկվել սոցփաթեթի շրջանակում:

11. Ապահովագրավճարի փոխհատուցումն ավտոմա՞տ եղանակով է կատարվելու, թե՞ քաղաքացին պետք է որևէ գործողություն անի:

 Քաղաքացու կողմից որևէ գործողություն անելու կարիք չկա: Միայն սոցփաթեթի շահառուները մեկ անգամ պետք է դիմում գրեն, որով սոցփաթեթի գումարն իրենց հաշվին փոխանցելու փոխարեն կուղղվի ապահովագրության հիմնադրամին:

12. 200 001 դրամ և ավելի աշխատավարձ ստացող քաղաքացիների աշխատավարձից ե՞րբ է լինելու ապահովագրավճարին ուղղվող առաջին պահումը:

Մինչև հունվարի 20-ը պետք է ապահովագրավճարի գումարը վճարված լինի:

13. Ինչպիսի՞ կառավարման կառուցվածք է ստեղծվելու առողջության ապահովագրության համակարգի ներդրման համար։

Համակարգը ներդնելու համար կստեղծվի հիմնադրամ, կձևավորվի հոգաբարձուների խորհուրդ, տնօրենը կընտրվի մրցութային կարգով:

14. Ո՞րն է առողջության ապահովագրության բարեփոխման հիմնական նպատակը։
15. Բնակչության առողջության պահպանում
16. Կյանքի միջին տևողության երկարաձգում
17. Հաշմանդամության և վաղաժամ մահացության նվազեցում
18. Կյանքի որակի բարելավում:
19. Ե՞րբ են քաղաքացիերը տեղեկացվելու, որ ընդգրկված են ապահովագրության համակարգում:

Մինչև հունվարի 1-ը քաղաքացիները կտեղեկանան, որ իրենք ներառված են ապահովագրության համակարգում:

16. Ինչպե՞ս է անձը հաստատելու իր համաձայնությունը` ընդգրկվելու ապահովագրության համակարգում և ինչպե՞ս է տեղեկանալու այդ մասին:

Քայլ 1. Քաղաքացին SMS հաղորդագրությամբ տեղեկացվելու է, որ նա ներառվել է ապահովագրության համակարգում, և անհրաժեշտ է համաձայնություն տալ։

Քայլ 2. Քաղաքացին պետք է գրանցվի «Արմեդ» հավելվածում և մեկ սեղմումով համաձայնություն տա պետության կողմից ապահովագրվելուն։

Քայլ 3. Եթե քաղաքացին չունի հասանելիություն էլեկտրոնային հավելվածին, ապա նա իր ընտանեկան բժշկի, ամբուլատոր թերապևտի, բուժքրոջ միջոցով ևս կարող է հաստատել իր համաձայնությունը:

17. Որտե՞ղ կարելի է ստանալ առողջության ապահովագրությամբ փոխհատուցվող բուժօգնություն։

 Առողջության ապահովագրության փոխհատուցմամբ բուժօգնություն կարելի է ստանալ թե՛ պետական, թե՛ մասնավոր բուժհաստատություններում՝ ապահովագրության վկայագրով:

18. Որտե՞ղ կարելի է ծանոթանալ ապահովագրության փաթեթում ներառված հիվանդությունների, ախտորոշումների, սքրինինգների և դեղերի ամբողջական ցանկերին։

Ապահովագրության փաթեթում ներառված հիվանդությունների, ախտորոշումների, սքրինինգների, ինչպես նաև դեղերի կոնկրետ ցանկերը հասանելի կլինեն «Արմեդ» հավելվածում, Առողջապահության նախարարության և Հիմնադրամի պաշտոնական կայքերում:

19.Եթե քաղաքացին ներառվել է ապահովագրության համակարգում և որոշակի ժամանակ անց դարձել է գործազուրկ, նա շարունակելո՞ւ է վճարել ապահովագրության համար:

Քաղաքացին գործազուրկ դառնալով` հաշվառվում է ժամանակավոր անաշխատունակության համակարգում, որտեղից էլ որոշ ժամանակ որոշակի գումար է ստանում, ուստի այդ ամիսներին ապահովագրության համար ևս պետք է վճարի: Քաղաքացին մեկ անգամ մտնելով ապահովագրության համակարգ` մնում է համակարգում 12 ամիս` անկախ նրանից, թե այդ 12 ամիսներին համապատասխանում է համակարգում ներառվելու պահանջներին:

20.Ի՞նչ տույժեր են սահմանված ապահովագրավճարը չվճարելու դեպքում:

Կկասեցվի ապահովագրության փաթեթը:

21.Ապահովագրության փաթեթը դեղերի փոխհատուցում ներառու՞մ է:

Այն դեղերը, որոնց գումարն ամբողջովին չի փոխհատուցվելու, քաղաքացին կարող է վճարել հավելավճար: