Մենք ունենք գործելու երեք տարբերակ Ադրբեջանի հետ հարաբերություններում. Իրանի նախագահի որդի

«Ոմանք արդեն որոշ ժամանակ շարունակ հայտարարում են, որ «Ադրբեջանն Իսրայելին օգնել է պատերազմում»։ Նման հայտարարություն անելուց առաջ անհրաժեշտ է ուսումնասիրել այս հայտարարությունը հաստատող փաստաթղթերն ու ապացույցները։ Արդյո՞ք հետախուզական և անվտանգության ծառայությունները հայտնել են դրա մասին։ Ի՞նչ ապացույցներ կան, որ Ադրբեջանն Իսրայելին աջակցել է Իրանի դեմ պատերազմում։ Անվտանգության մարմինները դա չեն հաստատել։

Ի՞նչ օգուտ կբերի այս հայտարարությունը մեր երկրին։ Արդյո՞ք մենք ուզում ենք, որ մեր հարաբերություններն Ադրբեջանի հետ լարված լինեն։

Իրանն ունի երեք տարբերակ Ադրբեջանի հետ հարաբերություններում։ Առաջինը՝ մենք ուզում ենք կռվել Ադրբեջանի հետ կամ Ադրբեջանին հրահրել մեր դեմ պատերազմի։

Երկրորդը՝ մենք ուզում ենք երկու երկրներն էլ լինեն «ոչ պատերազմ, ոչ խաղաղություն» վիճակում՝ առանց Ադրբեջանի հետ մեր հարցը լուծելու։

Երրորդ տարբերակն այն է, որ մենք ուզում ենք հարևաններ լինել և միասին աշխատել՝ չնայած փոխադարձ տարաձայնություններին։

Առաջին տարբերակն, անշուշտ, երկրի շահերից չի բխում։ Դժբախտաբար, հնչեցված մեղադրանքները երկիրը մղում են դեպի առաջին տարբերակը։ Երբ ինչ-որ մեկն ասում է, որ Ադրբեջանն օգնել է Իսրայելին պատերազմում, դա նշանակում է, որ Ադրբեջանը մեր թշնամին է։ Երբ ասում են, որ Ադրբեջանը մեր թշնամին է, դա նշանակում է, որ մենք պետք է կռվենք նրա դեմ։ Ես չեմ կարծում, որ երկրի մտավորականները նման մտադրություններ ունեն։

Երկրորդ տարբերակի կողմնակիցներն իրականում կարծում են, թե մենք Ադրբեջանի հետ թշնամի ենք, բայց չենք պատերազմի։ Այս տարբերակը ևս անկասկած մեր շահերից չի բխում։ Պատերազմը միայն ռազմական գործողություն չէ։ Նրանք միջազգային ֆորումներում քվեարկում են ձեր դեմ և որոշակի դիրքորոշում են ընդունում։ Նրանք կարող են վնասել տնտեսությանը...

Երրորդ տարբերակը հիմնված է այն ենթադրության վրա, որ բոլոր քաղաքական և միջազգային հարցերի, ինչպես նաև պետական կառավարման մանրամասների վերաբերյալ նույն դիրքորոշումներով ու մոտեցումներով երկու երկրներ և կառավարություններ չկան։ Հետևաբար, բնականաբար, տարբերություններ կան։ Սակայն ի հեճուկս տարբերություններին և երբեմն իրարամերժ շահերին, մենք կարող ենք գտնել ընդհանուր հարցեր, որոնց շուրջ կարող ենք համագործակցել և օգուտ բերել միմյանց։

Տնտեսական, առևտրային և նույնիսկ անվտանգության հարցերում մենք կարող ենք օգնել միմյանց և հնարավորինս լուծել կամ փորձել տարաձայնությունները նվազագույնի հասցնել։ Ես խորապես համոզված եմ, որ ոմանք բարի մտադրություններ ունեն, բայց չեն գիտակցում, որ իրենց համառությունը ոչ միայն վնասում է երկրին, այլև ծառայում է Իսրայելի բարօրությանը։ Եկեք զգույշ լինենք, որպեսզի Իսրայելի ձեռքում անգիտակից խաղազինվորներ չդառնանք»,- նշել է Յուսեֆ Փեզեշքիանը։