Ամստերդամում արգելել են գարեջրային հեծանիվները
Ամստերդամի դատարանը տեղի իշխանություններին թույլ է տվել արգելել Եվրոպայի որոշ քաղաքներում շատ սիրված այսպես կոչված գարեջրային հեծանիվները։ Այս մասին հայտնում է BBC-ն։
Այդ միջոցը փորձել են վիճարկել հեծանիվների վարձակալները։ Այսուհետ աղմկոտ քարշակները չեն կարող շրջել տեղի ջրանցքների մոտով։ Այս որոշումն ընդունվել է տեղաբնակների ճնշման տակ, որոնք բողոքում էին աղմուկից, երթեւեկության կանոնների խախտումից եւ այլ հակասոցիալական վարքից։ Գարեջրային հեծանիվների արգելքի մասին խնդրագիրը ստորագրել էին 6000 ամստերդամցի։ Նրանց դուր չէր եկել, որ քաղաքը վերածվել է զվարճանքի ատրակցիոնի։
Ավելի վաղ Պրահայում արգելել էին սեգվեյները, Վենետիկում՝ մերձավորարեւելյան խոհանոցով սրճարանները, աղմկոտ ճամպրուկները եւ սահմանափակել Սան Մարկո հրապարակ մուտքը։