Հելոուինին ընդառաջ Սպիտակ տունը «պատվել» է ահռելի սարդերով ու սարդոստայնով (լուսանկարներ, տեսանյութ)
Վաղը՝ հոկտեմբերի 31-ին, աշխարհի բազմաթիվ երկրներում՝ այդ թվում նաև Միացյալ Նահանգներում, միլիոնավոր մարդիկ նշելու են Բոլոր սրբերի տոնը կամ Հելոուինը, ինչը ենթադրում է տարօրինակ դիմահարդարում, արտասովոր հանդերձներ, ինչպես նաև տան թեմատիկ ձևավորում:
Ինչպես նշում է The Daily Mail-ը, դիզայներական ձևավորումից զերծ չի մնացել նաև ԱՄՆ նախագահի պաշտոնական նստավայրը՝ Սպիտակ տունը, որն այս կապակցությամբ «պատվել» է ահռելի սարդոստայնով ու սարդերով: Արդյունքում Դոնալդ Թրամփի նստավայրը նմանվել է սարսափ ֆիլմերին բնորոշ խորհրդավոր առանձնատան:
Առաջին տիկին Մելանյա Թրամփը Սպիտակ տան լուսանկարներով կիսվել է Twitter-ում՝ նշելով, որ իրենք պատրաստ են նշել Հելոուինը: Հայտնի է, որ այսօր ԱՄՆ նախագահն ու առաջին տիկինը կմասնակցեն հելոուինյան միջոցառման, Սպիտակ տանը կհյուրընկալեն դպրոցականներին ու նրանց քաղցրավենիք կբաժանեն:
Նախօրեին Թրամփն իր աշխատասենյակում հանդիպել էր Սպիտակ տան մամուլի ծառայության աշխատակիցների երեխաներին:
«Չեմ կարող հավատալ, որ մեդիա ոլորտի աշխատողները կարող են այսքան լավ երեխաներ ունենալ»,-կատակել էր Թրամփը, որը բավական բարդ հարաբերություններ ունի լրատվական դաշտի ներկայացուցիչների հետ:
