ՆԱՏՕ-ն դեմ է Թուրքիայի կողմից Ս-400 գնելուն

ՆԱՏՕ-ն դեմ է, որ Անկարան Մոսկվայից Ս-400 (С-400) զենիթահրթիռային համակարգեր ձեռք բերի հիմնականում անվտանգության նկատառումներով, այլ ոչ Ռուսաստանի և Արևմուտքի ռազմական տեխնիկայի տեխնիկական անհամատեղելիության պատճառով: Այդ մասին լրագրողների հետ հանդիպմանը հայտարարել է ՆԱՏՕ-ի ռազմական կոմիտեի ղեկավար, չեխ գեներալ Պյոտր Պավելը, հայտնում է ТАСС-ը:

«Ս-400-ի պոտենցիալ ձեռքբերումն ուղեկցվում է որոշակի հետևանքներով: Խոսքը չափազանց առաջադեմ համակարգի մասին է, որը չի կարող մասամբ տեխնիկական պատճառներով, բայց հիմնականում անվտանգության նկատառումներով, ինտեգրվել ՆԱՏՕ-ի ՀՕՊ/ՀՀՊ համակարգի մեջ»,- ասել է գեներալը:

Նա նշել է, որ այնուամենայնիվ, եթե երկիրը, գիտակցելով բոլոր հետևանքները, որոշում է ձեռք բերել այդ զենքը, դա այդ պետության որոշումն է:

Ավելի վաղ Թուրքիայի նախագահ Ռեջեփ Թայիփ Էրդողանը հայտարարել էր, որ Ռուսաստանը և Թուրքիան քննարկում են Ս-400 համալիրի ձեռքբերման համար վարկի պայմանները, և Թուրքիան արդեն կատարել է առաջին վճարումը: Հաղորդվել էր, որ Թուրքիան կգնի մի քանի Ս-400 համալիր՝ 2,5 միլիարդ դոլարով: