Ադրբեջանի ԶՈւ-ն կրակ է բացել Տրետուքի և Սոթքի հատվածում տեղակայված հայկական դիրքերի ուղղությամբ․ ՀՀ ՊՆ

Ադրբեջանի ԶՈւ-ն կրակ է բացել Տրետուքի և Սոթքի հատվածում տեղակայված հայկական դիրքերի ուղղությամբ, հայտնում է ՀՀ ՊՆ-ն։ «Հունիսի 13-ին՝ ժամը 11:30-11:45-ը, Ադրբեջանի ԶՈւ ստորաբաժանումները տարբեր տրամաչափի հրաձգային զենքերից կրակ են բացել Տրետուքի և Սոթքի հատվածում տեղակայված հայկական դիրքերի ուղղությամբ: Սոթքի հատվածում Ադրբեջանի ԶՈՒ-ն կիրառել է նաև ականանետ»,- ասված է հաղորդագրությունում:

Գերատեսչությունից տեղեկացնում են, որ հայկական կողմում տուժածներ չկան: Ավելի վաղ ՀՀ ՊՆ-ն հայտնել էր Գեղարքունիքի մարզի Սոթքի հատվածում Բաքվի կողմից հայկական դիրքերի գնդակոծման մասին։ «Հունիսի 12-ին՝ ժամը 14:15-ին, ադրբեջանական զինուժի ստորաբաժանումները տարբեր տրամաչափի հրաձգային զինատեսակներից և ականանետերից կրակ են բացել Սոթքի հատվածում տեղակայված հայկական դիրքերի ուղղությամբ»,- հայտնել էր ՊՆ-ն։