Իրաքյան Քրդստանում պատրաստվում են խորհրդարանական ընտրությունների

Իրաքյան Քրդստանում անկախության հարցով հանրաքվեից հետո պատրաստվում են խորհրդարանական ընտրություններին, հաղորդում է քրդական Nerinaazad.net կայքը:

Նշվում է, որ ընտրություններն, ամենայն հավանականությամբ, տեղի կունենան այս տարվա նոյեմբերի 1-ին: Ավելի վաղ հաղորդվում էր, որ անկախության հանրաքվեի բարեհաջող ավարտից հետո իրաքցի քրդերը խորհրդարանական ընտրություններ կանցկացնեն նոյեմբերի 6-ին:

Չի բացառվում, որ նոյեմբերի սկզբին Քրդստանում նաև նախագահ ընտրեն:

Հիշեցնենք, որ սեպտեմբերի 25-ին Իրաքյան Քրդստանում տեղի ունեցած անկախության հարցով հանրաքվեին մասնակցած քաղաքացիների 93.29 տոկոսն «այո» է ասել անկախացմանը: Հանրաքվեին մասնակցել է ընտրողների 72,16 տոկոսը:

Իրաքի վարչապետ Հայդեր ալ Աբադին հանրաքվեն անվանել է հակասահմանադրական և հայտարարել է, որ Իրաքն այն չի ընդունելու: Իրաքի իշխանությունները նաև հայտարարել են, որ բանակցություններ չեն վարելու Քրդստանի շրջանային կառավարության հետ քվեարկության արդյունքների վերաբերյալ: Հանրաքվեի անցկացման դեմ են հանդես եկել Թուրքիան և Իրանը, ինչպես նաև ԱՄՆ-ն և ՄԱԿ-ը: