ԵՊՀ-ի շատ դասախոսներ չեն գնացել երեկվա միջոցառմանը, գնացածների մի մասը լքել է դահլիճը մինչև Նիկոլ Փաշինյանի ելույթը․ Մենուա Սողոմոնյան

Երևանի պետական համալսարանը, որի գիտխորհուրդը նոյեմբերի 9-ից հետո արդարացիորեն պահանջեց Նիկոլ Փաշինյանի հրաժարականը, այսօր աջակցում է Նիկոլ Փաշինյանին, ով բացահայտ ասում է, որ Արցախն Ադրբեջանի կազմում պիտի լինի և իր քաղաքականությամբ նախապատրաստում է այդ հանգրվանը։ Այդ մասին ֆեյսբուքյան գրառում է արել ԵՊՀ դասախոս, «Համախմբման» անդամ Մենուա Սողոմոնյանը՝ շեշտելով, որ դա Նիկոլ Փաշինյանի և ԵՊՀ ռեկտոր Հովհաննես Հովհաննիսյանի համատեղ ջանքերով կազմակերպված PR ակցիա էր։

«Երեկ Նիկոլ Փաշինյանի և Հովհաննես Հովհաննիսյանի համատեղ ջանքերով իրականացվեց մի PR ակցիա, որի ուղերձը հետևյալն էր.

Այն Համալսարանը, որը 88-ի շարժման առաջամարտիկն էր, որի ռեկտոր Սերգեյ Համբարձումյանը այն ժամանակ խորհրդային կայսրությանն էր քննադատում բարձրաձայն ու անկաշկանդ, այն Համալսարանը, որի գիտխորհուրդը նոյեմբերի 9-ից հետո արդարացիորեն պահանջեց Նիկոլ Փաշինյանի հրաժարականը, այսօր աջակցում է Նիկոլ Փաշինյանին, ով բացահայտ ասում է, որ Արցախն Ադրբեջանի կազմում պիտի լինի և իր քաղաքականությամբ նախապատրաստում է այդ հանգրվանը։

Իհարկե, ԵՊՀ-ի շատ դասախոսներ չեն գնացել երեկվա միջոցառմանը, գնացածների մի մասը լքել է դահլիճը մինչև Նիկոլ Փաշինյանի ելույթը (կադրերում ուշադրություն դարձրեք թափուր նստատեղերին), դահլիճում եղել են Համալսարանի հետ կապ չունեցող շատ անձինք, Նիկոլի քաղաքական կցորդներ, ներկաների մի մասն էլ չի ծափահարել նրա ելույթի ավարտին, բայց ամեն ինչ վարպետորեն մատուցվեց հենց այնպես, ինչպես վերը նշեցի։ Վայելեք»։