Թաիլանդի նախկին վարչապետը Լոնդոնից քաղաքական ապաստան է հայցել

Թաիլանդի նախկին վարչապետ Յինգլակ Չինավաթը, որը հայրենիքում հեռակա 5 տարվա ազատազրկման է դատապարտվել հանցավոր անփութության համար, քաղաքական ապաստան տրամադրելու հայցով դիմել է Մեծ Բրիտանիային, հայտնում է CNN-ը՝ վկայակոչելով նրա «Փհիա Թհանի» կուսակցությունում աղբյուրին:

Նախօրեին հայտնի է դարձել, որ քաղաքական գործիչը Դուբայ է փախել, որտեղ է ապրում նրա եղբայրը՝ Թաիլանդի եւս մի նախկին վարչապետ Թաքսին Չինավաթը: CNN-ի աղբյուրները հայտնել են, որ Յինգլակ Չինավաթը 2 շաբաթ առաջ ԱՄԷ-ից Լոնդոն է տեղափոխվել: Մեծ Բրիտանիայի ներքին գործերի նախարարությունը այս կապակցությամբ դեռեւս մեկնաբանություններ չի տվել:

Նշվում է, որ նախկին վարչապետի փախուստը թաիլանդցիների համար մեծ անակնկալ է եղել: 2016 թվականին նա խոստացել էր դատավարությանը մասնակցել եւ իր անմեղությունն ապացուցել: Հարցազրույցում նա հավաստիացրել էր, որ երբեք չի մտածել փախուստի մասին:

Սեպտեմբերի 28-ին ոստիկանությունը Բանգկոկում խուզարկել է նախկին վարչապետի նստավայրը եւ նրա մերձավոր օգնականի տունը: Նրանք ԴՆԹ-ի նմուշներ են առգրավել, որպեսզի համեմատեն այն նմուշների հետ, որոնք վերցվել են ավտոմեքենայից, որը, ինչպես ավելի վաղ հաղորդվել է, օգտագործվել է նախկին վարչապետին Կամբոջայի սահման հասցնելու համար: Քննությունը մտադիր է պարզել բոլոր նրանց, ովքեր մասնակցել են փախուստի կազմակերպմանը եւ իրականացմանը:

NEWS.am