Ղազախստանում բազմակի օգտագործման զուգարանի թուղթ են ստեղծել
Ղազախստանում ինժեներների եւ գիտնականների խումբը ստեղծել է բազմակի օգտագործման զուգարանի թուղթ: Այս մասին Facebook-ի իր էջում հայտնել է Ղազախստանի Մուսուլմանների միության ղեկավար Մուրատ Թելիբեքովը, փոխանցում է Lenta-ն:
«Գաղտնիքը անսովոր նյութի մեջ է, որից պատրաստվում է զուգարանի թուղթը: Դրա բաղադրատոմսը գյուտարարները գաղտնի են պահում: Միակ բանը, որ լրագրողներին հայտնել են, այն է, որ թուղթը ստեղծվել է նանոտեխնոլոգիաներով կոմպոզիտային նյութերի օգտագործմամբ»,- նշված է հաղորդագրության մեջ:
Թելիբեքովը հայտնել է, որ Ղազախստանի Մուսուլմանների միությունը որոշել է նոր գյուտն ուղարկել WBAF-2018 համաշխարհային համաժողովին: Նրա խոսքով՝ սրանից բացի, ղազախ գիտնականները Կոտ դ՛Իվուարից իրենց գործընկերների հետ թփի հատուկ տեսակ են ստեղծել, որի տերեւները կարող են զուգարանի թղթի այլընտրանք դառնալ: