Նստածդ տեղն ամեն ինչ ունես՝ փող ունես, նավթ ունես, հանգիստ նստիր տեղդ. Էրդողանը՝ Բարզանիին
Թուրքիայի նախագահ Ռեջեփ Թայիփ Էրդողանը հայտարարել է, որ Իրաքյան Քուրդիստանի իշխանությունն անկախության վերաբերյալ հանրաքվեի կազմակերպմամբ «ինքն իրեն կրակն է գցել» և ստիպված է լինելու տանել դրա հետևանքները, գրում է թուրքական «Այդընլըք» պարբերականը:
«Ոմանք իրենց կրակը գցելու հետևանքով լավ կայրվեն», - ասել է Էրդողանը:
Թուրքիայի առաջնորդը մեղադրել է Իրաքյան Քուրդիստանի ղեկավար Մասուդ Բարզանիին նման քայլ կատարելուց առաջ այդ հարցը հարևանների ու պաշտոնական Բաղդադի հետ չքննարկելու համար։
«Դու մեզ հետ խոսեցի՞ր, Իրանի հետ խոսեցի՞ր, դաշնային պետության հետ խոսեցի՞ր: Ինչպե՞ս ես այսպիսի քայլ կատարում», - ասել է Էրդողանը:
Նա հեգնել է Բարզանիին՝ ասելով, որ վերջինս պետություն կառավարելը պատկերացնում է ցեղապետի պես հարց լուծելով, մինչդեռ դա այդպես չէ:
«Հյուսիսային Իրաքում՝ նստածդ տեղը, ամեն ինչ ունես. փող ունես, նավթ ունես, հանգիստ նստիր տեղդ», - դիմել է Էրդողանը Բարզանիին:
Ավելի վաղ Էրդողանը սպառնացել էր Իրաքյան Քուրդիստանին՝ հայտարարելով, որ մի գիշեր կարող են անսպասելի խուժել երկրի տարածք:
Հիշեցնենք, որ Քուրդիստանում սեպտեմբերի 25-ին անցկացված հանրաքվեի ընթացքում անկախությանն «Այո» է ասել քվեարկությանը մասնակցածների 92.73 տոկոսը: «Ոչ» է քվեարկել ընտրողների 7.2 տոկոսը: