Հայ կինը կռվում է 86-րդ փողոցում, Նյու Յորք, սեպտեմբեր 1956. Իսկ ի՞նչ պատկանելություն ունեն Հայաստանի ոստիկաններն այսօր

Հայ կինը կռվում է 86-րդ փողոցում, Նյու Յորք, սեպտեմբեր 1956։
Ամերիկացի լուսանկարիչ Վիվիան Մեյերի լուսանկարն է, որը փակցված է Փարիզի քաղաքապետարանի մետրոյի կայարանում։
Վիվիան Մեյերը անհայտ մարդ էր, Ամերիկայում դայակ էր աշխատում, մահացել է 2009-ին: Նրան բացահայտել է ամերիկացի վավերագրող Ջոն Մալուֆը` գտնելով նրա մոտ հարյուր հազար նեգատիվները, որոնցից մեկն էլ էս դրվագն է՝ մի անհայտ հայ կնոջ կյանքից։
Վեճի նյութն անհայտ է: Երևում է, որ ոստիկանի հետ է կռվում, հետևաբար կարող է փողոցային կանոնների հետ կապված լինել։
Ոստիկանի ազգությունը չի շեշտվում, դրա պատճառը կարող է լինել այն, որ ոստիկանների ազգային պատկանելությունն այնտեղ է, որտեղ նրանք ծառայում են։
Իսկ պատկերում երևացող կնոջ ազգությունը նշելը դուռ է բացում նրա մասին երևակայելու։
Ամենայն հավանականությամբ կինը Նյու Յորք է հասել Հայոց ցեղասպանության արդյունքում։ Թուրք ոստիկանների հետ կռիվներից ու սպանդից հետո, մի գործ է ճարել Նյու Յորքի 86-րդ փողոցում ու դրա հետ կապված բախվել է ամերիկացի ոստիկանին։
Այսօր Հայաստանի ոստիկանությունը մի քաղաքացու է բերման ենթարկել ու բացատրություն պահանջել, թե ինչու է «բոզի լաց» արտահայտությունը գործածել Հայաստանի վարչապետի կնոջ մասին խոսելիս։
Հայաստանի այդ այսպես կոչված վարչապետը այն էակն է, որը թուրքերին է հանձնում հայերի տարածքները ու գնում է Հայոց ցեղասպանությունը ժխտելու ճանապարհով։ Ժխտելու էն մեծ հանցագործությունը, որի պատճառով նկարում պատկերված կինը հայտնվել է Նյու Յորքում ու կռվի մեջ մտել ամերիկացի ոստիկանի հետ։
Եվ Ամերիկայում ծնված ֆրանսիացու ու ավստորհունգարացու խառնուրդ դայակը, որը սիրել է լուսանկարել Նյու Յորքի փողոցները և որին լրիվ պատահաբար բացահայտել է ամերիկացի վավերագրողը, ֆիքսել է հայ կնոջ կյանքից այս դրվագը ու դրվագը հայտնվել է Ֆրանսիայի մայրաքաղաքի մետրոյում, որտեղ ես՝ հայս, լրիվ պատահաբար նկատեցի ու մտորեցի Հայաստանում ոստիկանների հետ մեր այսօրվա վեճերի մասին։
Իսկ ի՞նչ պատկանելություն ունեն Հայաստանի ոստիկաններն այսօր։