ԱՄՆ-ը և Ռուսաստանը համաձայնել են, որ 2010-ի միջուկային պայմանագիրը պետք է իրականացվի առանց բացառությունների

ԱՄՆ-ը և Ռուսաստանը նախատեսում են շուտով փորձագիտական մակարդակով քննարկումներ սկսել 2010 թվականին ստորագրված միջուկային զենքի կրճատման պայմանագրի շուրջ: Այդ մասին հայտարարել է Ռուսաստանի արտաքին գործերի փոխնախարար Սերգեյ Ռյաբկովը երեկ Հելսինկիում Միացյալ Նահանգների պետքարտուղարի տեղակալ Թոմաս Շենոնի հետ հանդիպումից հետո:

Ըստ Ռյաբկովի՝ երկու կողմերը համաձայնել են, որ պայմանագիրը պետք է իրականացվի առանց բացառությունների:

2011-ի փետրվարից ուժի մեջ մտած համաձայնագիրը նախատեսում է երկու երկրների միջուկային սպառազինության նվազեցում՝ հասցնելով մարտագլխիկների թիվը 1550-ի, տեղակայված հրթիռների և ռումբերի թիվը՝ 700-ի, դրանց արձակման համակարգերինը՝ 800-ի: Համաձայնագիրը ուժի մեջ է մինչև 2021 թվականը, կողմերի համաձայնությամբ ժամկետը կարող է երկարաձգվել մինչև հինգ տարով: