ԱՄՆ-ում կողոպտիչ քաղցրակերները ուրիշի տուն են մտել հանուն հարսանեկան տորթի կտորի
24-ամյա Զաքարի Յուրեւիչը եւ 26-ամյա Էրիկ Ռոուսոնը կալանավորվել են ուրիշի բնակարան ապօրինի ներթափանցելու 2 դրվագով, հայտնում է Daily Mail-ը: 2 հանցագործությունն էլ կատարվել են Թոլանդում (Կոնեկտիկուտ, ԱՄՆ) կես ժամվա տարբերությամբ:
Հանցագործների ուշադրությունն է գրավել շքեղ հարսանեկան տորթը, որը նրանք ծայրամասի տներից մեկում նկատել են պատշգամբի ապակե դռան միջով: Զննելով շրջակայքը եւ համոզվելով, որ չեն կարող հեշտ թափանցել տուն եւ քաղցրեղենը վայելել, նրանք որոշել են ջարդել հարեւան տան փականը:
Գողերն այնտեղ միայն մի բան են գողացել՝ բեյսբոլի մահակը: Իսկ արդեն դրա օգնությամբ կոտրել են ապակե դուռը եւ վերջապես տորթին հասել:
Նրանք հափշտակել են նաեւ նոթբուք, մեկ շիշ ալկոհոլ եւ դրամապանակ:
Գողերն այնքան են տարվել հյուրասիրությամբ, որ չեն նկատել տանտիրոջ վերադարձը: Նա նրանց հայտնաբերել է սեփական խոհանոցում՝ հրուշակագործական կրեմով լղոզված: Այլանդակված հարսանեկան տորթից արդեն բացակայում էր հարսնացուի եւ փեսացուի պատկերով ավանդական գագաթը: