Մաքքեյնը Թրամփին անփորձ եւ իմպուլսիվ գործիչ է անվանել
Արիզոնա նահանգից հանրապետական սենատոր Ջոն Մաքքեյնը ենթադրում է, որ Կոնգրեսը ստիպված է աշխատել վատ տեղեկացված եւ իմպուլսիվ պետության ղեկավարի հետ, որը քաղաքական փորձ չունի: Սենատորը գործող նախագահին այսպես է բնորոշել The Washington Post-ում հրապարակված հոդվածում, գրում է ՏԱՍՍ-ը:
«Մենք պետք է հարգենք միմյանց կամ նվազագույնը հարգենք փաստը, որ մենք միմյանց կարիքն ունենք: Եվ սա երբեք այսքան ճշմարիտ չի եղել, որքան հիմա, երբ Կոնգրեսը ստիպված է աշխատել մի նախագահի հետ, որը պետական հաստատություններում աշխատանքի փորձ չունի եւ, որպես կանոն, վատ է տեղեկացված»,- գրել է Մաքքեյնը:
Նրա խոսքով՝ Սպիտակ տան այժմյան տերը «իմպուլսիվ է լինում իր խոսքերում եւ գործողություններում»:
«Մենք պետք է հարգենք նրա իշխանությունն ու սահմանադրական պարտավորությունները: Մենք պետք է փոխգործակցենք նրա հետ այն ոլորտներում, որտեղ դա հնարավոր է, սակայն մենք նրա ենթակաները չենք: Մենք նրա առջեւ հաշվետու չենք, մենք հաշվետու ենք ամերիկացի ժողովրդի առջեւ»,- գրել է սենատորը: