Գերմանիայում հասարակաց տների գնահատման նոր համակարգ կներդնեն՝ որակի բարձրացման նպատակով
Սեքսուալ ծառայությունների մատուցման դաշնային միավորումը մտադիր է գերմանական հասարակաց տների գնահատման նոր համակարգ ներդնել՝ նպատակ ունենալով բարձրացնել դրանց որակը: Այս մասին Sputnik Deutschland-ի հետ զրույցում ասել է կազմակերպության հիմնադիր Շտեֆանի Կլեեն:
«Որակի գնահատման համակարգ կա բազմաթիվ ոլորտներում: Ձեզ ծանոթ է, օրինակ, հյուրանոցային ոլորտի «աստղերի» համակարգը: Սա նույն բանն է, պարզապես այլ բնագավառում»,- ասել է Կլեեն:
Նրա խոսքով՝ նոր համակարգը սեքս-արդյունաբերությունում աշխատող կանանց կօգնի «լուրջ գործատուներին տարբերել անլուրջներից»:
Միավորումը հարցաշար է պատրաստել, որի հիման վրա էլ որակի գնահատական է տրվում: Հասարակաց տներում ստուգում են հիգիենիկ ստանդարտների ապահովումը, աշխատող կանանց եւ հաճախորդների համար առանձին զուգարանների առկայությունը, 2017 թվականի հուլիսի 1-ին ընդունված մարմնավաճառների պաշտպանության մասին նոր օրենքի նվազագույն չափանիշներին համապատասխանությունը:
Թագի տեսքով որակի առաջին գնահատականը կազմակերպությունը տրամադրել է բավարական Ռոզենհայմեում գործող Herz Ass հաստատությանը, օգոստոսի 24-ին: Առավելագույնը հաստատությունները կարող են վեց թագ ստանալ, եթե այնտեղ կան ջակուզի, բարձրակարգ սարքավորումներ, իսկ այցելուներին ուտեստներ եւ ըմպելիք են առաջարկում: