ԱՄՆ-ի հետ հարաբերություններում առաջիկայում դրական ոչնչի սպասել պետք չէ. ՌԴ գլխավոր հյուպատոս
Ռուսաստանի եւ ԱՄՆ-ի հարաբերություններում առաջիկայում դրական ոչնչի սպասել պետք չէ, սակայն նույնիսկ դժվարին պայմաններում ռուս դիվանագետները պետք է շարունակեն աշխատանքը։ Այս մասին «Կոմսոմոլսկայա պրավդա» պարբերականին տված հարցազրույցում հայտարարել է Նյու Յորքում Ռուսաստանի գլխավոր հյուպատոս Սերգեյ Օվսյանիկովը։
«Խոսելով ռուս-ամերիկյան հարաբերությունների առաջիկա հեռանկարների մասին՝ կնախընտրեմ զերծ մնալ կանխատեսումներից։ Կարծում եմ, որ ամերիկյան կողմն ամեն դեպքում ողջախոհություն կցուցաբերի, եւ ԱՄՆ-ում ռուսաֆոբիան կդադարի»,- նշել է Օվսյանիկովը։
Նյու Յորքում ՌԴ-ի գլխավոր հյուպատոսը չի բացառել ներկայացուցչությունը փակելու հնարավորությունը։ «Մենք չենք բացառում պետքարտուղարության նման որոշումը։ Եթե հենց մեր հյուպատոսությունը փակելու եւ այնտեղ աշխատող դիվանագետների թվի կրճատման հետ կապված պատժամիջոց սահմանվի, դա, առաջին հերթին, կազդի մեր հայրենակիցների վրա, կբարդանա վիզաներ, անձնագրեր ու լիազորագրեր տրամադրելու գործընթացը»,- հստակեցրել է Օվսյանիկովը։